٨ مطارح بقعدات مميزة بالهوا الطلق هالصيفية

في أحلى من المشاوير بالهوا الطلق بالصيفية؟ إذا عبالكن تعرفوا وين في قعدات مميزة بين نسمات الهوا، شوفوا معنا 8 مطارح بقعدات مميزة بالهوا الطلق حول لبنان!

1. سما مليتا، النبطية

سما مليتا مطعم معلق بين الأرض والسما بالجنوب، بحسسكن قاعدين بين الغيوم، قعدتو شرحة ومناسبة للعيل، المنظر بياخد العقل لغروب الشمس، والأكل على ذوقكن!

الرقم: 460 400 03

2. On The Rocks، مار شعايا، برومانا

هالمطرح قاعد بأحضان الطبيعة ببرمانا، بنسم عليكن الهوا الجبلي خصوصي على التراس، بتدوقوا مشروب طيب ببورد القلب، وبتقضوا أحلى اللحظات هالصيفية!

الرقم: 055 020 70

3. Lumberyard ، بيت شباب

هالمطرح مخبى بضيعة بيت شباب، مكان مميز لتهربوا من عجقة المدينة على أحضان الطبيعة وبين الشجر، قعدتو كتير مهضومة لتجربوا مشاوي طيبة أو تسهروا على مشروب طيب مع الأصحاب تحت الأضوية الخافتة والنجوم.

الرقم: 805 686 81

4. بيت الكابتن ، زغرين

بيت الكابتن جوهرة مخباية بزغرين، عندو قعدة ساحرة بين شجر الصنوبر والسنديان، الهوا بيغزل غزل وكل لقمة أطيب من التانية!

الرقم: 867 811 03

5. طاولة باكيش ، قناة باكيش، بسكنتا

طاولة باكيش بتقدم أطيب الأطباق المحلية ببسكنتا ومعمولة بكل شطارة، مكان مميز لتنبسطوا ببوفيه مع العيلة تحت بستان شجر التفاح ومع منظر الجبال العالية.

الرقم: 301 767 81

6. سكينة، فتقا

سكينة فتقا عبارة عن مطعم وبيوت ضيافة بحضن الغابة، بيقدم أطباق عالمية شهية، قعدة تراس ساحرة بالسهرة مع كاس نبيد، وجو رومانسي على الآخر!

الرقم: 225 522 70

7. Root 829، حصرون

بتطلعوا على ضيعة حصرون المعروفة بوردة الجبل وبتلاقوا قعدة مميزة بالجنينة عند مطعم روت، مكان حلو لتبوردوا بالجبل بالصيفية وتجربوا برغر غير شكل!

الرقم: 829 000 71

8. الطاحونة ، بعقلين

قعدة على ضفاف نهر بعقلين عنجد رح تفرفح قلبكن! مطعم الطاحونة جار النهر ببعقلين، بتجربوا غدا لبناني ومازة مميزة على صوت الميّ ونسمات الهوا الحلوة.

الرقم: 802 885 76

شوفوا كمان، ٥٠ محل تزوروه هالصيفية بلبنان: من الشمال للجنوب!