٩ زوايا ساحرة لعشّاق الكتب والقهوة بلبنان

لكل عشّاق القراية، هيدا المقال لإلكن! جمعنالكن أحلى محلات الكتب و القهوة بلبنان، ولازم تكون ع ليستة مشاويركن الجاية! 📚☕

بقلب بيروت

1. برزخ، الحمرا

هالجوهرة بشارع الحمرا تحولت من مكتبة صغيرة لبيع الكتب المستعملة ومحل قهوة بسيط لمساحة ثقافية للكل. بيستضيفوا ليالي موسيقية، عروض أفلام، تواقيع كتب وغيرها كتير من الفعاليات الحلوة.

2. Curl، بدارو

مكتبة بدارو الحبيبة مخبّية بين رفوفها من أندر الكتب الكلاسيكية، وبتجنّن شكل ومضمون! فإذا كنت من محبّين الكتب الكلاسيكية والأغلفة الحلوة، هيدا مطرحك. والأحلى؟ إنو المكان بيستقبل الحيوانات الأليفة، يعني فيك تشرب قهوتك وتدلّع حيوانك الأليف!

3. Hook، فرن الشباك

هيدا المكان الثقافي الحلو معمول لسكّان المدينة يلي ما بدن يبعدوا عن بيروت، بس بدن يكتشفوا شي جديد. Hook بيستقبل الحيوانات الأليفة، والجو فيه عنجد بخليك تتعرف ع ناس بسهولة! وكمان في مجموعة كتب بتسلي وبتشدّك تقرأها.

4. كافيه أنطوان، الأشرفية

e صار فاتح بـ ABC الأشرفية! بس ما تفكّروا إنو قهوة وبس—هالمكان هو ملجأ دافي للقرّاء، المفكّرين، ولكل حدا بحاجة لمطرح رايق. إذا ناوي تغوص برواية جديدة أو بس بدك تقعد مع أصحابك على فنجان كابتشينو، هالكافيه مصمّم ليعيشّك تجربة مكتبة أنطوان بطريقة جديدة ومميزة.

برا بيروت

5. Book A Coffee، بيت مري

هالجوهرة المخفية ببيت مري لكل حدا بدو يفلّ من العجقة ويلاقي راحتو بقلب كافيه لطيف. بيقدّمو تشكيلة طيبة من الحلويات والقهوة، ليكونوا الرفيق الأحلى لكتابك الجديد.

6. بيت ست الكل، حمانا

هيدا المحل هو مطعم وكافيه ومساحة فنية ومكان ترفيهي بمحل واحد، وأحلى شي فيه هو زاوية الكتب!

7. The Coffee Book، جبيل

ع قد ما هو دافي، ع قد ما هو ساحر! هالكافيه بيخطف قلب كل محبّ للكتب، من ديكوره البسيط لرفوفه المعبّاية كتب. هالمحل كان واحدة من أقدم المكتبات بجبيل قبل ما يتحوّل لهالزاوية الروعة يلي منشوفها اليوم!

8. Dreamers Bookshop Café، الجديدة

هالمطرح المهضوم بيقدملكن كل شي من اللاتيه للكعكة بالحامض، وحتى القصص الأدبية الكلاسيكية. فيكن تشتروا كتب و إنتوا ناطرين يحضروا إلكن القهوة، وبعدها تقعدوا وتضيعوا بين صفحات الكتاب وإنتوا عم تشربوا قهوتكن.

9. مكتبة وكافيه ميلي، بعلبك

هيدي مكتبة وكافيه للنساء بقلب بعلبك، وبتوفّر مساحة هادية للقراءة، الدراسة، أو بس لترتاحي. الرفوف دايمًا عم تتجدّد بكتب جديدة، ف تأكدي تزوريها أكتر من مرة لتكتشفي الإضافات الحلوة يلي عم يحطوها!

أي محل رح تختاروا لتستمتعوا ب الكتب يلي بتحبوهن مغ فنجان القهوة؟ ☕📚

شوفوا كمان، كافيه أول من نوعه بالنبطية، ولعشاق القطط بس!