١٩ نشاط ربيعي فيكن تعملوا بلبنان!

إجا الربيع، زهرت الدني، وبلش الطقس يدفا، وصارت المشاوير أحلى بكتير! صار الوقت تتركوا الروتين اليومي وتكتشفوا لبنان من جديد. لهيك، جمعنالكن ١٩ نشاط ربيعي بياخدوا العقل، من مغامرات بالطبيعة، لقعدات مهضومة، ولأماكن رح تغرّقكن بأجواء الربيع. جهزوا حالكن، لأن هالمشاوير غير شكل!

1. بوفيه بقلب بيت أثري محاط بالطبيعة عند غلوريا فتري، فتري

تخايلوا تقعدوا ببيت لبناني قديم، بقلب الجنينة محاطين بالخضار والجبال، وعم تاكلوا من بوفيه لبناني وعالمي بيشهي! كل أحد ابتداءاً من أول أيار وكل أيام الفرص الرسمية، بيت غلوريا رح يفتح ويمد سفرة فيها كل شي بتحبوه: سلطات، أطباق عالمية سخنة وباردة، أطباق المازة الفريش، مشاوي، فواكة وحلو… كل شي معمول على الإيد وبحب.

فيكن كمان تزوروا المعصرة، تدوقوا النبيد والعرق، وتحسوا إنكن عنجد بضيعة لبنانية على أصولها. السعر 45$ على الشخص، شامل كل شي مع نبيد وعرق مفتوح من المعصرة. وللولاد فوق الـ10 سنين السعر 25$.

وغير هيك، رح يفتح مسبح بيت غلوريا أول شهر حزيران. محل بيضمن مشوار من العمر للعيلة كلها!

تابعوهن هون على انستغرام حتى تضلوا تشوفوا كل أخبارهن! للمزيد من المعلومات أو الحجز، اتصلوا على: 005 135 71

2. قعدة بقلب الطبيعة عند Le Camp، دير الحرف

إذا بدكن تهربوا من الضجة وتشموا هوا نضيف، Le Camp هو الخيار الصح. مطرح واسع، فيه طاولات بين الشجر، مكان للمشاوي، وحتى محل ليلعبوا في الولاد! بتحسوا حالكن بقلب غابة زغيرة، ومثالي ليوم نزهة مع العيلة أو الأصحاب.

الرقم: 677 355 76

3. قضوا عطلة ربيعية ساحرة عند Martinos Getaway، دير كفيفان

فيكن تشوفوا البحر من التراس، تتسمروا تحت الشمس، وتقعدوا بالجاكوزي وتنسوا كل شي تاني. هالمكان بيدمج بين الراحة والطبيعة، وكأنكن سافرتوا ع جزيرة باليونان، مناسب لأجواء رومانسية أو لرحلة استجمام مع الأصحاب

الرقم: 985 933 70

4. زوروا المطعم الإيطالي La Burrateria الملون، الجميزة

ديكور ملون وساحر، طاولات ع ستيل الريف الطلياني، نقشات، ورود، وباستا بتاخد العقل! بتحسوا حالكن قاعدين بإيطاليا، بين شوارع فلورانس، وعم تتدللوا بأطيب أكل.

الرقم: 523 756 71

5. زوروا سيدة حريصا على التلفريك، جونية

الطلعة بالتلفريك لحالها مغامرة، خصوصي إذا كان الطقس حلو متل هلق. بتوصلوا ع العالي وبتشوفوا جونية كلها تحتكن، منظر بجنن من كتر ما حلو.

الرقم: 075 936 09

6. مارسوا رياضة الطيران الشراعي مع Cedars Paragliding، الأرز

إذا بتحبّوا الأدرينالين، هالتجربة لإلكن! طيروا فوق جبال الأرز، وشوفوا لبنان من فوق، كأنكن بحلم. المغامرة آمنة مع مرشدين محترفين، والمنظر ما بينتسى.

الرقم: 449 544 03

7. اكتشفوا ضيعة سرجبال، الشوف

جنة زغيرة مخباية بين التلال! شلالات، نهر بيرد الروح، ومطعم قاعد فوق المي بيقدم أطيب الأكلات اللبنانية. عندن تخت معلق عالشجرة بيطل عالوادي، مثالي للتصوير أو بس لتقعدوا وتتأملوا. وفيكن تناموا ببيت الضيافة وتقضوا ليلة بقلب الطبيعة.

الرقم: 024 600 81

8. زوروا سوق جبيل العتيق، جبيل

تمشاية بين شوارع السوق العتيق، ريحة الزهر وشجر الربيع وين ما كان.ما تفوتوا قعدة e Café المورّد، بتشربوا فنجان قهوة أو بتاكلوا لقمة طيبة بين كل الجمال.

الرقم: 316 163 03

9. تمشوا بسوق البترون العتيق، البترون

 الطرقات الضيقة، المحلات المهضومة وشغل إيد، اللمسة البترونية بالمطاعم والكافيهات… جو بيخطف القلب. اشربوا ليموناضة من شاهين أو حلمي، واقعدوا على المينا حد البحر وخلوا الهوا الربيعي يبوردكن.

10. عملوا رحلة على منطقة تعنايل، البقاع

مشوار كامل بكل معنى الكلمة! تمشوا حول البحيرة، شوفوا البط وطعموهن، ركبوا بسكلات، وختموها بأكل طيب وطازة من مزرعة تعنايل. نهار بتغيروا فيه جو، وبترجعوا مبسوطين من كل شي شفتوا.

الرقم: 568 620 08

11. روحوا جولة سياحية بالباص الأحمر، بيروت

زوروا مختلف مناطق لبنان مع Citysightseeing Lebanon. فيكن تزوروا أهم معالم بيروت وجبيل وصيدا بطريقة مختلفة، مع باص مكشوف بخليكن تتفرجوا ع المنظر. متعة وسياحة بنفس الوقت!

الرقم: 165 910 76

12. استأجروا ATV لنهار كلّو حماس، فاريا

استأجروا ATV من ProX Riding Club بكفردبيان يلي بأمن جولات مع مرشد بقلب جبال فاريا.

الرقم: 135 155 03

13. عملوا زيارة على منطقة بنشعي، زغرتا

 بحيرة بنشعي بتجمع العيلة كلها! برمة بقلب شختورة، غدا طيب بمطعم البحيرة، وحديقة حيوانات بتفرح الكبار والولاد. مكان بيروق الأعصاب!

الرقم: 358 550 06

14. قضوا نهار ع البحر بمنطقة أنفه، الشمال

شمس، بحر، رياضة الغطس، وأطيب سمكة مشوية! أنفه معروفة بألوانها الزرقا والبيضا، وبأجواءها الهادية. ما في أحلى من نهار ربيعي بقلب منتجع تحت الريح أنفه.

الرقم: 117 788 70

15. جربوا البوظة عند La Glâce de Badiane، النقاش

 مش حيلا بوظة! عندن طعمات ربيعية مميزة متل الغاردينيا، والفستق الحلبي.

الرقم: 884 844 03

16. تفرجوا على منظر مغيب الشمس من Sight، دير القمر

جلسة ملونة ومهضومة، ومنظر الغروب ساحر مع كباية مشروب أو قهوة بتكمل المشهد.

الرقم: 325 072 03

17. بوردوا قلبكن عند كوكتيل لحود، الدورة

 إذا بدكن شي ببورد القلب، لازم تمرقوا عند لحود! كوكتيل فواكة طازة، مانغا، فريز، أناناس… وبيقدموها بكاسات ملونة بتفتح النفس مع صوص قشطة وعسل.

الرقم: 206 265 01

18. اسرحوا بعالم مليان ورد عند جلسة ورد، يحشوش

مطعم قاعد بين الورود! ريحة الورد المعطرة أول ما توصلوا، وكل طبق فيه لمسة ورد: من الشراب لفتة الورد الجوري. المكان بيشبه القصص الخيالية.

الرقم: 014 273 03

19. شاركوا بقطاف الورد بضيعة قصرنبا مع إم عدنان، البقاع

قصرنبا مش بس ضيعة، تجربة! ومع إم عدنان، التجربة غير شكل. من قطاف الورد البلدي الصبح، لزيارة المعبد الروماني القديم، لتقطير مي الورد ع الطريقة البقاعية الأصيلة… النهار ببلش بريحة ورد وبيكمل ببرنش ب قلب الضيعة، بيشبه ضيافة البيوت القديمة.

الرقم: 571 856 81

أي نشاط ربيعي رح تختاروا تعملوا حول لبنان؟

شوفوا كمان، ١٠ مطاعم ولا أطيب بإطلالة ساحرة على الجبل!