فشوا خلقكن وكسروا… عنجد! اكتشفوا غرفة الغضب بلبنان

في شي بلبنان ما بتتوقعوا إنو يكون موجود ويمكن يكون الحل السحري لكل مشاكلكن… مكان فيكن تكسروا وتفشوا خلقكن متل ما بدكن. مش كافيه، ومش بار، ومش جيم… عم نحكي عن Smash It، أو متل ما منحب نقول: غرفة الغضب!

فيكن تكونوا زعلانين، تعبانين من الشغل، مقهورين من الحياة، أو حتى خالصة قصتكن مع حدا حبيتو ومش عارفين شو تعملوا بالغضب يلي جواتكن. هونيك، الحل واضح: كسروا كل شي!

من أول ما تفوتوا، بيلبسوكن تياب حماية. كفوف، وأكيد كاسك للراس في نظارات. بتفوتوا عالغرفة، وبتلاقوا قدامكن عالم تاني ناطركن… تلفزيونات، طابعات، سيارات، كمبيوترات، قناني، وكل شي قابل للكسر.

وما تفكروا إنو ضروري تكونوا لحالكن. فيكن تاخدوا رفيق، أو حتى تطلعوا مع حبيبكن وتعيشوا موعد غرامي عنجد خارج عن المألوف! فيكن تتحدوا بعض، تشوفوا مين بيكسر أكتر، وتضحكوا.

والأحلى؟ فيكن تفشوا خلقكنن بطريقة آمنة. ما حدا رح يلومكن، ولا حدا رح يسألكن ليش عم تكسروا. الكل هون جايي يعمل نفس الشي… يكسر، يصرخ، ويطلع الغضب يلي جواتو.

كل ضربة بتعملوها، بتريحكن أكتر. بتحسوا بجسمكن عم يفضى من الطاقة السلبية، وكأنكن عم تتجددوا. ومتل ما بقولوا من بعد كل حرب في سلام، فمن بعد كل حرب مع حالنا ومن بعد كل فشة خلق في راحة نفسية وسلام!

وإذا حابين تروقوا راسكن، أو حتى تعملوا تجربة غريبة مع أصحابكن، جربوها. رح تطلعوا من عندن مرتاحين نفسياً حتى أكتر من جلسة يوغا يمكن.

العنوان: سد البوشرية
الرقم: 221 147 70

شوفوا كمان، بابل فوتبول بلبنان: تجربة جديدة وحماسية للعيلة كلها!