شو الفرق بين الملوخية اللبنانية والملوخية المصرية؟

من فترة، ولع تويتر بخناقة مهضومة بين اللبنانيين والمصريين… والسبب؟ الملوخية! الأكلة اللي عنجد إلها محل خاص بكل بيت، صارت حديث الساعة وسببت جدل. بس الحقيقة إنو الملوخية مش متل ما الكل مفكر، كل بلد بيحضرها بطريقتو. والمقارنة الكبيرة عطول بتكون بين الملوخية اللبنانية والملوخية المصرية، لأن الفرق بيناتن مش بس بالمذاق، بل بالشكل والطريقة وكل التفاصيل.

خلونا نشوف الفرق سوا!

بالمطبخ اللبناني، الملوخية ما بتتحضر بسهولة وبدها شوية شغل. أول شي منورقها ورقة ورقة، ومنغسلها شي عشر مرات لتصير نضيفة من الغبرا والوحل. بعدين مننشرها ع شرشف تتنشف شوي. بهالوقت منكون عم نجهز الدجاج، مننضفو ومنقطعو، ومنحطو مع بصلة بقلب الطنجرة مع مي. بس تغلي، منشيل الزفرة ومنتركو ينطبخ ع مهلو شي ساعة.

منرجع منبلش نطبخ ورق الملوخية بالسمنة أو الزيت ع نار هادية. بعد شي ١٠ دقايق منكب فوقها المرق والدجاج، ومنترك الطبخة تغلي شوي. وبمقلاية تانية، مندق التوم مع الكزبرة. هالخليط هو سر النكهة اللبنانية، ومنضيفو عالملوخية قبل ما نتركها تكمل ربع ساعة عالنار.

وقت التقديم، هون الفن الحقيفي. الملوخية بتنحط بطبق كبير، فوقو الدجاج، حدو رز مفلفل وخبز محمص بيقرش قرش وبطعم الصحن. وأكيد ما فينا ننسى الصوص السحرية: خل وبصل، وفي ناس بتزيد عليها حامض حسب الذوق. وبتطلع النكهة؟ غنية، تقيلة، ومليانة حموضة.

بالمقابل، الملوخية المصرية عندها ستايل مختلف. الورق بينفرم ناعم، وبيتحول لشوربة خضرا ناعمة. وبينحط بآخر مرحلة، بس تكون الدجاجة استوت. منضيف فوق المرق بندورة مقشرة، عصرة ليمون، وشي حبة مستكة للنكهة، وبيغلي كل شي سوا شي ٥ دقايق.

تقديمن أبسط، شوربة ملوخية ناعمة، فيها الدجاج مغطس، جنبها رز أبيض وخبز. ما في لا خبز محمص ولا خل وبصل. أكلة خفيفة بس فيها نكهة مميزة.

الفرق الحقيقي؟ بالشكل والطعمة. الملوخية اللبنانية فيها الورق واضح، مش شوربة، وكل شي بيتقدم بقلب على جنب. أما الملوخية المصرية فبتجي مفرومة، أنعم، وشكلها جايي ع شوربة. وآخر شي، كل واحد وذوقو.

بس المهم، الملوخية بتضل ملوخية، وبكل بيت إلها طقوسها ومحبينها.

وإنتو؟ أيا ملوخية بتفضلوا؟ اللبنانية ولا المصرية؟

شوفوا كمان، ثكنة عسكرية مسكونة بالأرواح الشريرة بلبنان؟ سمعوا هالقصة!