خبر حلو: الحكومة اللبنانية تلغي المراسيم وتسترجع الشواطئ العامة

بخطوة واعدة للساحل اللبناني والملكية العامة، مجلس الوزراء رسمياً ألغى تلات مراسيم مثيرة للجدل صدرت خلال الأسابيع الأخيرة من حكومة رئيس الوزراء السابق نجيب ميقاتي. هيدي المراسيم كانت بتسمح لشركات خاصة بالاستيلاء على أجزاء كبيرة من الشاطئ العام وتفتحه للتجارة. وهالشي مخالف للقانون وانعمل من دون التفكير بالمصلحة العامة.

هيدي الخطوة تُعتبر تقدّم كبير باستعادة الأملاك العامة البحرية للبنان ووضع حد لسنين من الخصخصة المستمرة بدون حساب. كمان هالتغيير بيدل على توجه نحو حماية الموارد الطبيعية للبلد ودفع مقابل للسنين الطويلة من الاستغلال غير الشرعي اللي تبعت الحرب الأهلية.

الفضل بيروح لخليفة رئيس الوزراء نجيب ميقاتي، رئيس الوزراء نواف سلام، ووزير الأشغال العامة فايز رسامني، لإتخاذن هالخطوة الجريئة.

شو كانت هالمراسيم؟

بحسب المفكرة القانونية، الثلاث مراسيم سلّموا تقريباً 150,000 متر مربع من شط لبنان العام للأيادي الخاصة:

المرسوم الأول ورقمو 14331 (البحصاص): عطى منتجع “بالما” أكتر من 76,000 متر مربّع من الساحل تحت حجة قانون معالجة التعديات الحاصلة زمن الحرب. بسّ الحقيقة إنّو المخالفات صارت بين 2011 و 2012، يعني عقود بعد ما خلصت الحرب.

المرسوم التاني ورقمو 14379 (زوق بحنين، عكّار): منح أفراد من عيلة دبوسي أكتر من 53,000 متر مربّع ليبنوا مرفأ خاص – والأرجح إنّو لتفريغ حمولات النفط – من دون ما يوضحوا شو الهدف الحقيقي. كل هيدا صار من دون مراجعة المجلس الأعلى للتنظيم المدني، ورافقه استملاكات مشبوهة لربط البحر بالطريق العام.

المرسوم الثالث ورقمو 14620 (القليلة، صور) سلّم 14,560 متر مربّع من الساحل لشركة ما بقت موجودة. الأرض مصنّفة زراعية، وكمان مرق المرسوم بالرغم من اعتراض التنظيم المدني.

مين تحداهن؟

مجموعة من الجمعيات البيئية بما فيهن جمعية الخط الأخضر والجنوبيين الخضر والمفكرة القانونية رفعوا دعاوى قانونية للاعتراض على المراسيم. المفكرة القانونية كمان نشرت تحليلات قانونية مفصلة بتوضح كيف المراسيم عم تخرق القوانين اللبنانية.

ردًّا على الضغط، الحكومة أكدت إنها طلبت مراجعة قانونية كاملة للمراسيم، مما أدى بالنهاية لإلغائها.

ليه مهم يلي صار؟

هيدا الحراك هو فوز نادر ومهم للأملاك العامة البحرية بلبنان. مش بس بيمنع الاستيلاء الغير قانوني على الأراضي، بس كمان بيفتح الباب لعكس سنوات من الأذى اللي صار للساحل – الأذى اللي غالبًا نعمل بدون محاسبة وورا الأبواب المسكرة.

منأمل تكون هالخطوة بداية جدية لاسترجاع حق الشعب اللبناني، وإنو نحافظ على يلي باقي من الساحل الطبيعي الرائع للبنان.

شوفوا كمان، كل شي لازم تعرفوا عن باصات النقل المشترك بلبنان: الخطوط، التكلفة، الدوام!