٧ وجهات لعشاق الفروسية والخيل بلبنان!

في شي سحر بركوب الخيل ما بينفهم إلا إذا جربتوا ولو لأول مرة… بتحسوا حالكن حرين، راكبين وسط الطبيعة، والشمس عم تغيب ورا الجبل. إذا بتحبوا الخيل، أو حتى حابين تتعلموا، بحبشنا وفتشنا ولقينا ٧ أماكن عنجد بياخدو العقل، من الشمال للجنوب، وجهات لعشاق الفروسية والخيل بلبنان، كل واحد إلو نكهتو الخاصة.

يلا نبلش جولتنا:

١. Cedars Horse Riding Club، عين زحلتا

هالمحل شي خيالي، خاصة بالشتوية! عم تتخايلوا حالكن راكبين على حصان بين التلجات؟ شي متل الأفلام. النادي مدرسة كمان، يعني فيكن تتعلموا من الصفر وتوصلوا للاحتراف. وكلو وسط طبيعة بترد الروح. تجربة مميزة!

الرقم: 397 155 81

٢. Horse Ville Club، القرية

هون الجو كتير مهضوم، بتحسوا حالكن بمحل سياحي بامتياز. في فريق بيهتم فيكن خطوة بخطوة، وبيعلمكن كل شي بهدوء إحترافية. إذا بدكن تبلشوا وتتعلموا الأساسيات، هيدا المحل مناسب لإلكن. أما إذا عبالكن تمارسوا هالرياضة بهدوء وبعيد عن العالم والعجقة، هون رح تلاقوا طلبكن.

الرقم: 091 969 81

٣. Shaha Equestrian Center، بسبعل

هيدا المركز هوي بيت عشاق الخيل بالشمال. من أول ما بتفوتوا، رح بتحسوا بطاقة إيجابية. بين الدروس والاهتمام بالخيل وممارسة الفروسية، كل شي متوفر. فيكن تتمرنوا وتنبسطوا بنفس الوقت.

الرقم: 479 497 71

٤. Cavallino Equestrian Club، طريق صيدا جزين

هيدا المكان جنة زغيرة، راقي ورايق. إذا بتحبوا المناطق الجنوبية، التجربة هون عنجد غير. بيهتموا بالتفاصيل وبالراحة النفسية للركاب وللحصان. وبيجوا عالم من كل المناطق ليجربو! مش بس هيك فيكن تمارسوا هيدي الهواية بنص الطبيعة وتروحوا تكتشفوا المنطقة لوقت مغيب الشمس.

الرقم: 350 575 81

٥. Lebanese Equestrian Center، بيت مري

بتلاقوا هالمحل بقلب بيت مري، بين الطبيعة الخضرا والهوا النضيف. هيدا المركز مميز من حيث الدروس والنظام، ومناسب للكل: كبار وزغار. من التجارب لي بتعيشوها عندن، ركوب الخيل مع منظر بيخطف الأنفاس وأكيد دروس بالفروسبة للمبتدئين ولعشاق الخيل.

الرقم: 076 954 71

٦. River Ranch Riding School، نهر الكلب

هيدا المحل غير شكل! مش بس مدرسة لتلعم الفروسية، مرات بيعملوا رحلات على الخيل حد النهر أو بقلب الغابات للمحترفين! تخايلوا حالكن راكبين وعم تسمعوا صوت المي، شي عنجد برد الروح. للمحترفين والمبتدئين، هون رح تلاقوا ملاذكن الخاص بعيد عن هموم الحياة اليومية.

الرقم: 411 811 03

٧. Auberge de Tyr، صور

فيكن تقضوا نهار أو حتى ليلة بمنتجع فخم وسط الطبيعة، تسبحوا، تركبوا خيل، تتمشوا بين الحيوانات بالميني زو، وتنبسطوا بكل لحظة. تجربة فخمة بس بسيطة، خاصة إذا نازلين عالجنوب وبدكن تعيشوا أكتر من مغامرة بنهار واحد!

الرقم: 233 339 71

شوفوا كمان، ٧ محلات لتجربوا الحمام التركي بلبنان.