٥ جواهر مخفية لازم تزوروهن بجبال لبنان!

في أماكن معروفة بكل زاوية بلبنان، بس في جواهر مخباية ما بيعرفها إلا يلي بيحب يفتش و يكتشف. بجبال لبنان وبين الطبيعة، في بيوت ضيافة بتاخد العقل، بتنسيكن العجقة والضغط النفسي، وبتعيشكن تجربة غير شكل! إذا كنتو حابين تهربوا شوي من الضجة، هول ٥ جواهر مخفية بجبال لبنان رح يخلوكن تحسوا إنكن بعالم تاني.

١. بيت سردة، جاج

بيت ضيافة متل القصص بجرود جبيل، من خشب، مهضوم بقلب الطبيعة ومجهز بكل شي وبروق الراس والأعصاب. عندن بيسين خاص وبساع عدد كبير من الأشخاص، محل كتير رايق وبيحملكن على جو تاني بكل الفصول.

الرقم: 647 948 03

٢. La Moontagne، بسكنتا

بيت جبلي لكل حدا حابب يهرب من المدينة، العجقة والضجة. مجهز بأدق التفاصيل وعندن كل وسايل الراحة والكنكنة. وهيدا البيت قريب على كل الضيع السياحية الحلوة، جوا دافي وبرا المنظر بياخد العقل وخرج سردة مع فنجان قهوة وهوايات الجبل الحلوين.

الرقم: 498 405 70

٣. Mountscape، بمهري

تخايلوا حالكن بقعدة بالجبل، بانغالو من قرميد، وكلو شبابيك بتفوت منها الشمس وين ما كان. في مرجوحة، بيسين لترويق الراس، ومطعم لبناني بأطيب أكل. الميني فيلا عندن مميزة بتراس وجاكوزي وجنينة زغيرة، بس السر الحقيقي هوي الترويقة البلدية اللي تفيقوا كرمالها الصبح مع المونة البلدية!

الرقم: 172 720 71

٤. Villa de las Flores، قضاء البترون

إذا كنتو من محبي البيوت الحجر العريقة، هون رح تعيشوا جو غير شكل. شبابيك خشب، قعدة بتطل عالجبل، بيسين، وجنينة بتاخد العقل. متل الحلم، وكل زاوية بتحسوها مأخوذة من قصة قديمة، بس بكل وسايل الراحة اللي تتخيلوها. غير إنو فيكن تقضوا إيام حلوة، البيت رح يخليكن تخلقوا أحلى ذكريات لكل مناسباتكن! أعراس، أعياد، وحفلات من جميعو!

الرقم: 172 162 76

٥. L’escape، فاريا

بقلب جبال فاريا، في قعدة زغيرة مع فيو بطير العقل. بين الجبال، مع جاكوزي وبيسين، القعدة هون بتخليكن تنسىوا الوقت والزمن، لأن المكان مجهز لتسترخوا وتعيشوا اللحظة. الديكور مستوحي من الشاليهات السويسرية وفيكن تستمتعوا بالأجواء الجبلية من الصبح لعشية. القعدة برا بترد الروح فيكن تعملوا مشاوي أو ركوة قهوة غير شكل.

الرقم: 774 400 81

شوفوا كمان، قهوة الأرز: لقمة طيبة وقعدة فوق الغيوم، كأنكن بسويسرا.