٨ محلات لتجربوا الحمام التركي بلبنان

الحمام التركي مش مجرد مكان للاستحمام، هوي تجربة متكاملة للاسترخاء والتنضيف العميق. من إيام العثمانيين، كان الحمام جزء من الثقافة، مطرح ما يجتمعوا الناس مش بس ليغسلوا جسمن، بل ليستمتعوا بالبخار الدافي، والتدليك بزيت الزيتون، والتقشير بالصابون البلدي ويحكو مع بعض. اليوم، تجربة الحمام التركي بعدها محافظة على نفس الطقوس، بس مع لمسات حديثة من الراحة والرفاهية.

لهيك حبينا نخبركن عن حمامات تركية لتجربة تراثية بقلب لبنان.

المحلات التراثية

١. خان السلطان، عرمون

أول ما تفوتوا، بتحسوا كأنكن فتتو ععالم قديم. الأرضي الحجر، الدفا يلي مغلف المكان، والبخار يلي بيشيل عنكن تعب الأسبوع. هون التجربة أصيلة، بتبلش بالمي السخنة، وبتكمل مع جلسة تدليك.

الرقم: 354 030 03

٢. حمام باب الحارة، الحدث

إذا كنتو من محبين الفخامة، هون بتعيشوا تجربة على مستوى تاني. الإضاءة الخافتة، روائح العطور الشرقية، والموسيقى الرايقة بتخليكن تنسوا كل شي برا. من أول ما تقعدو، ببلش التدليك بزيوت دافية بتريح العضلات وبتشيل عنكن التعب. وبعد الحمام، بتقعدو بزاوية زغيرة بتشربوا شاي سخن وبتحسوا حالكن سلاطين.

ملاحظة: حالياً عم يعملوا أعمال صيانة بعدها مستمرة
الرقم:406 470 05

٣. حمام الورد، صيدا

هون المكان بسيط، بس في سر ما بتعرفوا غير بس تعيشوا التجربة. البخار والمي السخنة بتفتح كل مسام جسمكن. تجربة الحمام هون بإيدين خبيرة، وبتحسوا كأنكن خلقتو من جديد بعدا.

الرقم: 702 730 07

٤. حمام البكوات، الحمرا

تجربة حمام تراثية، هون كل التفاصيل مدروسة لتكون التجربة مريحة ومترفة. بلاط رخام، وأضوية خفيفة بتشعركن بالراحة من اللحظة الأولى. بتبلش ببخار عميق بيفتح المسام، وتجربة تدليك بزيوت عطرية بتخلي ريحة جسمكن تاخد العقل.

الرقم: 626 813 03

المحلات يلي أكتر موديرن

٥. Bamboo Spa، أنطلياس

المكان هون مودرن، بس حافظ على جوهر الحمامات التراثية. البخار، المي السخنة، والتدليك على الحجر كل شي موجود. بس بالإضافة لسبا متكامل، بقدموا جلسات استرخاء ومساج الأحجار الساخنة.

الرقم: 514 444 71

٦. Beirut Spa، الأشرفية

تجربة كلاسيكية مع لمسة فخامة. بتفوتوا، بتتركوا كل شي برا، وبتبلشوا تجربة جديدة. البخار، الموسيقى، والأيادي الخبيرة يلي بتعرف كيف تفك كل توتر بجسمكن. وبعدها، بيجي دور المساج بزيوت طبيعية ليختم تجربة مستحيل تتكرر.

الرقم: 581 188 81

٧. Inbalance Center، طرابلس

هيدا المكان لمحبي التجارب المتكاملة. مش بس عندو حمام تركي، بل عندو مساحة استرخاء شاملة. بعد ما تخلصوا جلسة البخار والتدليك، في غرف مجهزة بعلاجات مختلفة للجسم والوجه، لتطلعو وإنتو حاسين حالكن إنسان جديد.

الرقم: 864 879 76

٨. أوتيل البستان، بيت مري

إذا بدكن تعيشوا تجربة رفاهية كاملة، أوتيل البستان هوي المكان المثالي. فيكن تقضوا وقت ولا أروع بالمسبح الداخلي أو تختاروا جلسة مساج محترفة . الحمام التركي عندن بيخليكن تنسوا التعب كأنكن بغير عالم..

الرقم: 000 752 03

هيدي مش بس حمامات، هيدي رحلة على زمن السلطنة، وقت كان البخار بياخدكن لمطرح تاني، والريحة الطيبة بتفصلكن عن كل الهموم. من وقت العثمانيين ولبنان مليان حمامات تركية، كانت أول شي للملوك والباشوات، وبعدين صارت لكل لي بدو يدلل حالو. اليوم، بعد كل هالسنين، بعدها هالمحلات محافظة على روحها، بتنضف الجسم، بتريح الراس، وبتخليكن تحسوا إنكن سلاطين للحظة.

شوفوا كمان، ٥ مطاعم وكافيهات فتحوا جديد ببيروت لازم تجربوهن!