٥ ضيع سياحية قريبة من بيروت، تعرفوا عليها!

هالدني عجقة، وكل واحد فينا بيحلم بيوم يفل في من المدينة ويشم هوا نضيف، بس بلا ما يضيع نهاروا كلو عالطرقات. إذا عبالكن مشوار سريع وبتحبوا الضيع والهوا النضيف، هيدي 5 ضيع سياحية قريبة من بيروت ما بتبعد أكتر من ساعة عنها، وكل وحدة عندها سحرها الخاص.

١. بحمدون، عاليه

بحمدون ضيعة بتفوح منها ريحة المصايف القديمة، البيوت القرميد، والأوتيلات يلي بيخبوا قصص من الزمن الجميل. بتعرفوا إنو في معبد يهودي أثري ببحمدون؟ فيكن تزوروا وتتعرفوا على تاريخو الغني. كمان ما فيكن تكونوا ببحمدون وما تمرقوا على محطة القطار المهجورة يلي كانت تربط بيروت بالشام. المشي بهالشوارع متعة لحالها، خصوصي مع الهوا البارد بالربيع.

المطاعم يلي مننصحكن تجربوها: Le Télégraphe de Bellevue، Olivo

٢. حمانا، بعبدا

حمانا مشهورة بالكرز، بس مش هيدا السبب الوحيد يلي لازم تزوروها. هي ضيعة بتحسوها عايشة بكل الفصول، بالشتوية بتكون رايقة متل قصة رومانسية، وبالصيفية بتصير فرحة وعجقة لكل يلي بدن يهربوا من الشوب. فيكن تزوروا شلالات حمانا، تمشوا جنب النهر، وتاخدوا صور. ولازم أكيد تمرقوا على ساحة الميدان، وتعملوا قعدة عند قهوة الهيبة مطرح ما تصور المسلسل. وبآخر النهار، احفظوا أحلى لحظة عند مزار مار شربل، منظر المغيب من هونيك بخلي القلب يسرح بخيالو.

المطاعم يلي مننصحكن تجربوها: بيت ست الكل، Piazza 1140، تشري لاين

٣. فالوغا، بعبدا

فالوغا ضيعة بتجمع بين التاريخ والجمال، بيوت تراثية، طبيعة ما بتشبعوا منها، وهوا منعش ببورد القلب. ومن أغلى كنوزها منبع مي الصحة، المي العذبة النقية لي بيشربوا منها كل أهل الضيعة. روحوا على غابة الأرز، شوفوا أول مطرح انرفع في العلم اللبناني، وتمشوا حد البحيرات الساحرة وعملوا بيكنيك بالطبيعة.

المطاعم يلي مننصحكن تجربوها: Hotel Rami & Restaurants، الوسام

٣. ضهور الشوير، المتن

ريحة الصنوبر، بيوت القرميد، وجو الضيعة الرايق، هيدي ضهور الشوير. ضهور شوير كانت إيام زمان وجهة لكل الأجانب والعرب، وكانوا أهم الفنانين يسهروا بأوتيل القاصوف الكبير يلي كان يستضيف حفلات أسطورية. فيكن تزوروا طاحونة الصايغ، تتمشوا بالسوق العتيق، وتعملوا نزهة وسط الطبيعة. هيدي الضيعة، كل شي فيها بذكركن الزمن الجميل.

المطاعم يلي مننصحكن تجربوها: كركة الحج، مطعم السد، The Butcher’s Crib

٥. وطا الجوز، كسروان

وطا الجوز ضيعة يلي بتخطف القلب، بالصيف برود وبالشتوية بتغطس بالتلج، بس بالحالتين المشوار عليها حرزان. مشهورة بمزارعها ومطاعمها الريفية، وجوّها الجبلي بيخلي أي يوم عادي يصير مغامرة. إذا بتحبوا القعدة برا مع صحبة حلوة، وريحة الطبيعة والمشي بين الصنوبر، هون رح تحسوا حالكن بضيعة على الدقة القديمة.

المطاعم يلي مننصحكن تجربوها: The Chill Hill Experience، أفران الضيعة

ما في شي بيسرقكن من ضغط الحياة متل طلعة عالضيعة، فحضروا غراضكن، شغلوا الموسيقى، وخدوا السيارة على وحدة من هالضيع… مشوار قصير بس الذكريات رح تضل معكن لفترة طويلة!

شوفوا كمان، ١٨ مطاعم وكافيهات مهضومة مع جنينة بلبنان.