بتعرفوا إنو في مطعم فيكن توصلوا عليه بالحصان بلبنان!؟

الولاد عطول بحبوا يجربوا قصص جديدة وبيعشقوا المغامرات ولأن قرب الويك-أند، أكيد محتارين وين تاخدوا الولاد وكيف تقضوا نهاركن وتبسطوا العيلة كلها.

جايبلكن فكرة كتير حلوة ومهضومة يلي هي زيارة مطعم جديد مليان نشاطات بقلب البترون: Lustrous Restaurant بقلب Batroun Village Club.

شو يلي بميز هالمطعم؟

إنو فيكن توصلوا عليه بالحصان. عم تتخايلوا الولاد شو رح يكون شعورن بس يجربوا هالشي وياخدوا صور لألبوم العيلة.

حد المطعم في مزرعة مهضومة بيقدروا الولاد يزوروها بس بدن ويتفرجوا على الحيوانات ويطعموهن ويركبوا على الحصان. ولا أهضم من هيك فكرة. كمان في ألعاب حول المطعم للولاد وبيعملولن نشاطات متل التلوين وتزيين البسكويت والرقص وتزيين الوج وألعاب ما بتخلص.

الوقت المناسب لتزوروا هيدا المطعم هوي الأحد، ليش؟

لأن أول شي هيدا الأحد، أحد المرفع. بس مش بس كرمال هيك، لأن Lustrous Restaurant بيعملوا كل أحد بوفيه مفتوح على مد عينكن والنظر.

كل شي ممكن يتخيلوا عقلكن موجود، من مقبلات باردة لمقبلات سخنة، أكل لبناني وأجنبي رح يكونو جاهزين وناطرينكن على الطاولات. البوفيه بيتضمن مجموعة متنوعة من السلطات والباستا والمعجنات وكل الحلويات يلي بحبها قلبكن.

مش بس هيك، عندن فيو على البحر بياخد العقل! فيكن بعد هيك مشوار كمان تنزلوا تتمشوا بسوق البترون من بعد ما تكونوا قضيتوا نهار حافل مع الولاد.

بالنسبة للأسعار ببتراوح على الشكل التالي: 35$ على الكبار، 20$ على الولاد ودخول مجاني للولاد يلي تحت ال5 سنين.

العنوان: البترون
الرقم: 181 538 81

شوفوا كمان، ٩ مطاعم بلبنان بتقدم بوفيه مفتوح بأفضل الأسعار.