رحلة لأغرب 11 مواقع بلبنان… واحد منن قصر مسكون!

لبنان معروف بجمال طبيعتو، بس كمان فيه أماكن ومباني ما بتشوفوا متلن بمحل تاني! إذا حابين تعيشوا تجارب غريبة وتزوروا أماكن بتخطف النظر، هاللائحة لإلكن. جهزوا حالكن لجولة غير شكل!

١. بيت الهرم، مزيارة

هيدا البيت من أغرب المباني بلبنان! مبنى على شكل هرم فرعوني بضيعة مزيارة، شكلو بيخليك تحس كأنك انتقلت لعصر الفراعنة. مشهد بيستاهل الزيارة والصور أكيد!

٢. حوض السمك المهجور، البترون

كان مفروض يكون أكبر معرض بحري بلبنان، بس الحرب وقفت المشروع. شكلو مدور ومبني على طوابق، بس اليوم صار مهجور وكأنو مكان من فيلم خيال علمي. إذا بتحبوا الغرافيتي، قلب هالمحل مليان فن ورسومات بتخطف النظر، غير إنو الغروب من هون بيطلع خرافي!

٣. متحف بصبوص، رشانا البترون

هيدا البيت مش عادي، هوي متحف فني مفتوح! الإخوة بصبوص حولوا رشانا لمعرض منحوتات بيخليكن تحسوا حالكن بوسط عمل فني. كل زاوية فيها منحوتات بتحكي قصة. إذا بتحبوا الفن، ما فيكن تفوتوا هالمكان!

الرقم: 099 033 03

٤. بيت كاتالبا، بيت الدين

إذا بدكن تجربة مش متل العادة، بيت كاتالبا لازم يكون على لائحة الأماكن يلي لازم تزوروها. الغرفة فيها بيسين بقلبها، يعني بتقدروا تكونوا بالمي وعم تحضروا فيلم بنفس الوقت! فوق هيدا كلو، الحديقة بتجنن، والترويقة الصبح تحت الشجر كأنكن بقلب مشهد سينمائي.

الرقم: 089 093 03

٥. بيت الطيارة، مزيارة

بيت على شكل طيارة؟ إي، هيدا الشي موجود بمزيارة! مايكل سليمان قرر يبني بيتو على شكل Airbus A380 تحقيقاً لحلمو من الطفولة. وهلق صار معلم سياحي ملفت! وإذا عملتوا جولة بهالضيعة، رح تشوفوا بيوت تانية بأشكال هندسية غريبة بتدهشكن.

٦. قصر الأحلام، بخعون

هيدا القصر مش بس إسمو “الأحلام”، هوي عنجد حلم تحقق! محمد حوشار جمع حجارة من كل أنحاء العالم وبنى هالقصر المذهل. أخد 25 سنة ليخلص، بس النتيجة؟ قطعة فنية معمارية بتوقفوا قدامها مذهولين.

الرقم: 278 511 03

٧. إكسبو حاقل، حاقل (جبيل)

أول متحف للحفريات البحرية بالشرق الأوسط! تأسس سنة 1991 من قبل رزق الله نهرا، وبيحملكن برحلة عبر الزمن مع حفريات عمرها 98 مليون سنة، كلها مستخرجة من لبنان. غير هيك، فيكن تعملوا هايكينغ، تنقيب عن الحفريات، وتجربوا الأكل القروي بهالمنطقة الرائعة.

الرقم: 371 659 76

٨. عنب، مار مخايل

مطعم لبناني بقلب مار مخايل، بس السر؟ في كهف مخفي جواتو! البيت تراثي، الديكور حميم، والقعدة بتعطي أجواء غير شكل. إذا بدكن تاكلوا أكل لبناني أصيل بجو ساحر، لازم تمرقوا علي!

الرقم: 441 444 01

٩. مومياوات عمرها ميات السنين، المتحف الوطني

بلبنان في مومياوات عمرها أكتر من 700 سنة! اكتشفوها سنة 1989 بوادي قاديشا، وبقيت محفوظة بشكل طبيعي مع تيابها وغراضها. المذهل إنو كانوا مسيحيين موارنة هاربين من الاضطهاد، وتركوا وراهن كتابات بالعربي والسرياني. تجربة بتجمع بين التاريخ والغموض!

الرقم: 703 426 01

١٠. قصر اسحاق بيك طربي “بيت الأشباح”، أيطو

من أغرب الأماكن بلبنان! هيدا القصر كان يعج بالحياة، بس اليوم صارت الناس بتخاف تقرب عليه. يلي زاروا بيقولوا إنن بيسمعوا أصوات غريبة، صريخ، وحتى حدا عم ينازع! إذا كنت بتآمنو بالقصص المرعبة أو لا، هيدا القصر بيضل واحد من أكثر الأماكن الغامضة بلبنان.

١١. مبنى البعصة، راس بيروت

هيدا المبنى الرفيع والمعروف بـ”الشختورة” أو “البعصة”، بني سنة 1954 بمنطقة المنارة على مساحة زغيرة كتير، وكان الهدف الوحيد منو يحجب البحر عن جار صاحبو! بيحكوا إنو هالشخص كان عندو مشاكل مع خيو، وبعد ما أخد نصيبو من الأرض حس حالو مظلوم، فقرر يبني هالمبنى الضيق بس ليقهر خيو. عرضه ما بيتعدى 4 متر، وأضيق غرفة فيه 60 سم بس! بس القصة التانية بتقول إنو كان مفروض يكون واحد من أجمل المباني ببيروت وصمموه على شكل سفينة، ومن هون إجت تسمية “الشختورة”.

كل هالأماكن بتخليكن تعيشوا تجربة ما بتنحكى، بتنحس! أي واحد منن حابين تزوروا أول شي؟

شوفوا كمان، ٩ محلات مهضومة لازم تزوروهن مع ولادكن!