عرفتوا إنو رامي عياش عمل غنية جديدة لرئيس الجمهورية؟

مع انتخاب قائد الجيش العماد جوزاف عون رئيس للجمهورية اللبنانية، قرر رامي عياش يفاجئنا بشي جديد: عمل غنية جديدة للرئيس. غنية “يا قائدنا” هي رسالة حب وتقدير للوطن وللرئيس الجديد، وبتأكد مرة تانية إنو الفن بلبنان حاضر ليحكي بصوت الشعب.

شو القصة؟

رامي عياش، اللي ما بينفصل عن وطنيتو، أطلق غنية “يا قائدنا” من كلمات الشاعر مازن غنام وألحان رامي وتوزيع داني حلو. الغنية بتنقل مشاعر اللبنانيين بصدق، وبتكرم القائد جوزاف عون على إنجازاتو الكبيرة بقيادة الجيش. ومن أول لحظة، الغنية خطفت الأنظار وصارت حديث السوشال ميديا!

كلمات الغنية بتحمل رسالة قوية، وبتقول:
“لبنان بدّو عالكراسي رجال
يبنوا وطن بحواسهن الخمسة
الكرسي ما فيها تصنع الرجال
الرجّال يللي بيصنع الكرسي
يا قائدنا إنت الأبدى
حميت الجيش وصنت المبدا
اللي حافظ عدستور بلادي
بتلبقله الكرسي ببعبدا.”

الكلمات البسيطة بس عميقة، بتوصل فكرة واضحة: إنو القيادة الحقيقية بتجي من القلب والضمير.

رامي عياش وأعمالو الوطنية

هيدي منا أول مرة بيخصص رامي عياش أعمالو للبنان. بين “أنا لبناني” وغيرها من الأغاني، أثبت إنو الفن ممكن يكون رسالة أمل ووطنية. وهلق، مع غنية “يا قائدنا”، رامي عم يفتخر مرة جديدة بهويتو اللبنانية.

الغنية صارت متوفرة على كل منصات السوشال ميديا، وعم تنتشر بسرعة. إذا بعد ما سمعتوها، أكيد لازم تسمعوها وتشوفوا الكليب اللي بيجمع لقطات مؤثرة من حياة الرئيس جوزاف عون العسكرية.

شوفوا كمان، بتتذكروا نجوم ستار أكاديمي 1؟ شوفوا كيف صاروا بعد 21 سنة!