بتحبوا القريدس؟ هيدا ألذ مطعم مأكولات بحرية ببيروت!

إذا فيديوهات الناس هي وعم تستمتع بجميع أنواع المأكولات البحرية عم تملي صفحتكن متلنا، أكيد طالع عبالكن طبق مليان مأكولات بحرية طازة ومليان صوص شهية. هون رح نخبركن عن مطعم شريمب ريبابليك Shrimp Republic، مقصدكن بالجمّيزة لتدوقوا أشهى وأطيب المأكولات البحرية وخاصةً القريدس ببيروت!

هالمطرح لكل حدن بيحب يتلذذ بالقصص الزغيرة… وهون قصدنا كراب رولز، الكالاماري، وسلايدر القريدس. هالمطعم بيشجع الزباين ياكلوا بإيديهن ويعيشوا تجربة أكل ممتعة ومغطّسة بالصوص!

لمسة “Shrimp Republic” المميزة بتقديم المأكولات البحرية بتغري الكل يجربها، حتى يلي ما بيحبوا السي فود. وحدة من ألذ الخيارات عندن هي سلايدر القريدس. معمولة من خبز البريوش الصغير ومحشية بقطعة قريدس مع خلطة المحل، معها سلطة كول سلو الآسيوية، الكبيس، وصلصة Republic الخاصّة فيهن.

إذا بتعرفوا عن ال seafood boil mukbangs، بتعرفوا إنو القصة كلها بالصوص، يعني لازم تنغمسوا بخبصة وعجقة أكل بتشهي. وأكيد، الأطباق الرئيسية عندن ما بتتفوت! عندكن خيارات بين القريدس، بلح البحر، أو خلطة السي فود seafood mix يلي فيها قريدس، كالاماري، بلح البحر، وكراب. حصة كبيرة من مأكولات بحرية من إختياركن، مطبوخة بالصلصة بتاخد العقل، ومعها درة مسلوقة وكل الأطباق الجانبية المفضلة عندكن.

أحلى شي؟ إنكن تختاروا الصوص. بيقدموا خمس خيارات مختلفة: صوص كاجن، كاري، آسيوي، أحمر، وصوص كريمي بالأعشاب.

Shrimp Republic بيقدم تجربة أكل إستثنائية وشهية بقلب بيروت، ولازم تجربوا مع أصحابكن أو الناس يلي بتحبوهن!

يلا إعزموا أصحابكن على أكلة سي فود من الأحلام!

للمزيد من المعلومات، تأكدوا تزوروا حسابن على إنستغرام.