أسرار حياة شروق صانشاين: شو لي ما بتعرفوا عن زوجة دكتور فود؟

شروق أو “شروق صانشاين“، اللي فجأة صارت حديث السوشال ميديا، معروفة بمحتواها وشهرتها اللي زادت بعد زواجها من جورج ديب، المعروف بـ”دكتور فود“. بس مين هي شروق؟ وشو في تفاصيل ما بتعرفوها عن حياتها؟

شروق، خلقت بمدينة رام الله بفلسطين وعاشت جزء كبير من حياتها بدبي. من بدايتها كانت طموحة واشتغلت بمجالات كتير. بس الشهرة الحقيقية بلشت مع تيك توك، مطرح ما قدرت تجمع ملايين المتابعين بمحتوى كوميدي وترفيهي، وكمان بمقاطع رقص ومشاهد من حياتها اليومية.

هالشهرة كانت بمثابة بطاقة عبور لعالم النجومية، بس بنفس الوقت، فتحت عليها باب وجع الراس والدراما اللي ما عم تخلص.

زواجها من دكتور فود

سنة 2022، دخلت شروق مرحلة جديدة بزواجها من جورج ديب، المعروف بـ”دكتور فود”، اللي اشتهر بمحتواه عن الطبخ والأكل. الثنائي صاروا يعملوا محتوى مشترك ولفتوا الأنظار بمزيج من الطبخ والحب.

من أول لحظة ظهرت فيها شروق مع جورج، صاروا حديث السوشيال ميديا. شروق اللي كانت تنشر محتوى متنوع، لاقت مع دكتور فود شريك مزج حياتها مع عالم الطبخ والمغامرات. الثنائي خلقوا ماركة شوكولا مع بعض، روجوا لمنتجات وشاركوا حياتن اليومية مع جمهور كبير. زواجن كان واضح فيه الحب، بس ورا الكواليس، الأمور ما كانت بهالوضوح. والحكاية ما ضلت كلها وردية…

خيانة على الهوا مباشرة!

الكل كان مصدوم لما شروق طلعت ببث مباشر على تيك توك، وبلشت تواجه جورج وتتهموا بالخيانة قدام الآلاف اللي كانوا عم يحضروا. كان جورج عم يحاول يهدّي الوضع، عم يترجاها تسكّر اللايف، وحتى اتصل بأمها وخيها ليساعدوه، بس شروق ما سكتت. بالعكس، لمّحت إنو جورج كان عم يخونها مع شخصية معروفة من تيك توك، وقالت كيف تركت ابنها اللي عمره 3 شهور لحالو بالفندق لتلحق جورج، وهي حافية!

رغم الخيانة وكل الدراما، شروق فاجأت جمهورها بإعلان حملها بطفلها التاني. الجمهور انقسم بين داعم وناقد: في ناس شافوا إنو شروق عم تحاول تحافظ على عيلتها، وفي ناس ما قدروا يستوعبوا كيف ممكن تبقى مع شخص خانها بهالشكل.

حياتها اليوم

بعد كل اللي صار، جورج موجود بالسجن من أشهر، وشروق اليوم عم تتنقل بين لبنان وكندا، محافظة على صورتها كسيدة أعمال وناشطة. هيي سفيرة لماركة SheGlam وبتنشر محتوى عن الجمال والموضة والأكل، بس كل الأضواء عليها حالياً بسبب علاقتها المليانة جدل مع جورج.

اليوم الجمهور عم يتابع بحشرية شو رح يكون مصير هالثنائي، خاصة بعد ولادة الطفل التاني. هل شروق رح تقدر تقلب الصفحة وتكمل حياتها لوحدها؟ أو رح تضل مع جورج وتواجه معو كل التحديات سوا؟ الأيام رح تكشف، والأكيد إنو الناس ما رح توقف تحكي عن هالقصة.

لتعرفوا أكتر عن خبر حمل شروق صانشاين زوجة دكتور فود، شوفوا: شروق زوجة دكتور فود أعلنت إنها حامل!