مراسلة أجنبية: “علموني أهل الجنوب استمتع بلبنان حتى بالحرب”

بريانكا نافاني مراسلة أجنبية هندية ل TRT World عم توثق الحياة بمدينة صور جنوب لبنان وسط التوترات المستمرة. مؤخرًا، نشرت فيديو عم تشارك نصيحة أخدتها من أهل الجنوب، اللي انصدمت كيف عايشين حياتن اليومية.

بالفيديو، بتقول: “لما وصلت أول مرة ع الجنوب، فكرت إني ما لازم إتمشى الصبح… فكرت إني ما لازم أقعد عالبحر و إستمتع فيه… لأنو نحنا بوسط حرب.”

ولكن زملائها الصحفية يلي من الجنوب علموها كيف تعيش اللحظة وتستمتع بالبلد مهما كانت الظروف. هني بيرفضوا إنه ما ينبسطوا بلبنان، وبيكملوا نشاطاتن اليومية متل الصيد، والسباحة، أو ممارسة الرياضة. ومن هيدا المنطلق، بلشت تستمتع بالمشي الصبح على الكورنيش أو الشط بمدينة صور!

بفيديو تاني، فرجت حدا عم يغطس بالرغم من غارتين جوية عنيفة على صور قبل بيوم. بتقول: “أهل جنوب لبنان بيستمروا بالسباحة.”

كتار منا ممكن يحسوا بالذنب لما يفرحوا بأشياء صغيرة بهالأوقات الصعبة. إنو نعيش هاللحظات الحلوة ما بيعني إنه نتجاهل الصعوبات حوالينا، بس بيساعدنا حتى نعبي طاقاتنا ونضلّنا أقوياء رغم كل شي.

شوفوا كمان، بالفيديو: بياع ورد يزرع الجمال وسط دمار الضاحية