بتعرفوا إنو في مطعم شعبي ببيروت عمره 134 سنة؟

مطعم السوسي من أقدم المطاعم ببيروت، وصرلو حوالي 134 سنة عم بقدم أطيب الأكلات اللبنانية على أصولها. المطعم شعبي وقديم بجوو وأجوائو، وبيقدم تجربة ما في متلها. كل ما تروحوا، بتلاقوا عجقة عالمحل، والناس ناطرة بفارغ الصبر لتتروق عند “السوسي“. الناس بتجي من كل المناطق، بس حتى تدوق أكل الحج السوسي.

المطعم بلش سنة 1890 كدكان زغير خلف بلدية بيروت، والمؤسس الحاج محمد السوسي بعرق جبينو كبرو وصار من أشهر مطاعم العاصمة بوقتها. بالتلاتينيات كبر المحل أكتر وصار مقصود من الكل. هلق المطعم بظهر محطة الطبش بفردان، والكل بيجي حتى يدوق الفول، الفتة، والحمص يلي ما بيتفوتوا.

السوسي معروف بأطباقو الطيبة والبسيطة، يلي بتخلي الواحد يرجع مرة ومرتين وتلاتة. بتفوتوا عالمطعم بتشموا ريحة الفول والفتة، وبتشوفوا العمو اللي عم يشتغل من قلبو وبإيدو كل طبق بيطلع. الفول عندو نكهة مميزة، والفتة باللبن ولا أطيب. كل شي بيقدموا، من الفول والحمص للبيض بالقاورما، كلو بجنن! وحتى السودة النية أو المقلية إلها طعمة مميزة ما بيلاقيها الواحد بأي محل تاني.

ديكور “مطعم السوسي” ما تغير من وقت ما بلش. بسيط ومتواضع، كراسي وطاولات خشبية وبلاستيكية، بتعكس جو المحلات الشعبية القديمة ببيروت. بس هالشي بضيف على روحية المكان، اللي الناس بتحب ترجعلو مش بس للأكل، بل لهالدفا اللي بتحس فيه وإنت قاعد وعم تتشارك أطيب الأطباق مع أهلك وأصحابك.

الأكل اللي بيقدموا بمطعم السوسي متوارث من جيل لجيل بالعيلة، وبتحسوا إنو كل طبق معمول بدقة وحرص ليبقى بنفس النكهة اللي كانت من 100 سنة. وهيدا السر اللي خلى مطعم السوسي يستمر بكل حب لليوم.

ما في شي فخم، بس هيدا اللي بيخلي التجربة أصيلة وبيروتية مية بالمية. اللي بعد ما زار السوسي، عم يضيّع على حاله فرصة العمر.

العنوان: مار الياس طلعة شحادة جنب فرمشيا إبن رشد
الرقم: 145 312 01

شوفوا كمان، أطيب كبة بشحمة بلبنان وين؟