التانت سهام: مطعم سمك ع شط البترون

عم تنبشوا على قعدة غير شكل بالبترون وزهقتوا من نفس المحلات يلي معودين عليها؟ نحنا حندلكن اليوم على أحلى قعدة بالبترون وصدقونا رح تكونوا كتير مبسوطين هونيك.

مطعم التانت سهام محل بياخد العقل ع شط البترون، بيتميز بديكورو وموقعو وقعدتو يلي بتطول العمر. كراسي وطاولات ممدودة أكل طازة على صوت المي وضحكة التانت سهام لكل ضيوفها.

فتح مطعم التانت سهام بال2020 يعني مش من كتير زمان وهي وولادها فاتحين المطعم وبضلو بقلبو مش حدا غريب يعني قعدة أهلية بمحلية. التانت يهام بتحضر الأكل على دياتها وولادها بساعدوها، قدي حلو هيك شي وفيا العالم تنزل من عندن على البحر، إذا بحبوا يتسبحوا أو يقعدوا تحت، القعدة بتجنن متل جزر اليونان.

اللقمة لقمة بيت والقعدة على البحر وبيستقبلوكن أحلى استقبال كأنكن بالبيت. القعدة كتير حلوة على البحر دغري وبتخليكن تحسوا حالكن عم تاكلوا بالبيت.

شو بدنا نخبركن عن هالمطعم لنخبركن، كل شغلة بالمطعم شاغلينها هالعيلة المهضومة من الديكور والزريعة للأكل وهني بينزلوا كل يوم بكبوا قفاص وبجيبوا سمك طازة من البحر. المطعم مهضوم ومكنكن لكل مين زهق من قعدات المطاعم التقليدية.

صيد اليوم طازة ومشكل: سمك ع أنواعو، كلمار، كراب، قريدس، سلمون، مع صلصلات وخلطات مميزة…استحلوا واختاروا! وأكيد مع صحون المازة اللبنانية يلي بتلبق لأكل البحر متل التبولة، الفتوش والبطاطا الحرة والحمص والبطاطا المقلية البيتوتية. شوفولنا هالمنظر شو حلو!

الشط كمان كتير حلو ورايق ونضيف. كمان عنده مقاعد بالمي ليلي حابب يتشمس وياخد لون ويسبح.

هيدا المحل خرج جمعة غير شكل مع العيلة أو الأصحاب لتستمتعوا بهالطقس الحلو هالصيفية.

يلا ع البترون.

العنوان: شارع البيادر، البترون
الرقم: 008 594 70

شوفوا كمان، جنينة حلوة بجزين فتحت جديد: بوفيه وموسيقى وأكل طيب.