المطبخ اللبناني الأول عربياً وال ٢٥ عالمياً!

موقع Taste Atlas عندو خبرية جديدة! المطبخ اللبناني الأول عربياً و المرتبة ال ٢٥ عالمياً بتقييم ٤.٤، وهيدا يعتبر رقم عالي وتقييم ممتاز. و المراتب الأولى كانت للمطبخ الإيطالي، والياباني، واليوناني. 

مع انو بالنسبة إلنا المطبخ اللبناني الأول بكل شي، بس هيدا التقييم دليل انو مطبخنا طيب وبينحب وين ما كان، خصوصي لما يكون التوم الأول عالمياً بتقييم الصوص، و شاورما لبنانية بالمرتبة التالتة عالمياً بين أفضل سندويشات، والفتوش و التبولة بأول ١٠ أطيب سلطات بالعالم. 

اختار موقع Taste Atlas أطباق الحمص، بابا غنوج، المتبل، الفتة، الفلافل، شاورما، الكنافة، الصفيحة، الكبة، الفتوش، منقوشة، وكمان التوم والزعتر و المعمول كأشهى الأكلات التراثية اللي ممكن تجربوها بلبنان. 

وبينصحنا هالموقع بكذا مطعم لبناني لتجربة المطبخ اللبناني ع أصولو، متل مطعم لو شيف، مطعم بابل الشهير، مطعم ت-مربوطة، إم شريف، الحلاب، مطعم منير، مطعم مايريغ، وغيرها من المطاعم المحلية المحبوبة. بس لتعرفوا عن مطاعمنا اللبنانية المفضلة، شوفوا الرابط هون. 

خبرونا، شو رأيكن بهيدا التقييم؟