صار في محل عم يعمل صفيحة على الحطب!

مين بحب الصفيحة كتير؟ وكيف إذا كانت هالصفيحة على الحطب؟ اليوم رح نعرفكن على محل كتير مهضوم وخرج مشوار مع العيلة والأصحاب وبيستاهل المسافة صراحة.

هالمحل إسمو Sol Bistro ما صرلو زمان فاتح ببعلبك وبتعرفوا شو الحلو عندو؟ إنو عندو فيو ساحر على قلعة بعلبك. وبتخليكن تحسوا حالكن مروقين على الآخر لأن مش بس بقدم ترويقة وغدا وعشا، عندو كمان القهوة شي فاخر عالآخر، وما بتلاقوها وين مكان.

غير هيك، عندن كل أنواع وأصناف الترويقة اللبنانية يلي بيستحليها قلبكن من الكشك للحلوم والزعتر والمكدوس والفول والفتة والمسبحة والمناقيش والكنافة. كل شي بيخطر عبالكن موجود. ناطرينكن عبكرا وعلى الضهر وعشية لترتاحوا شوي من هموم الحياة وتاكلوا لقمة طيبة.

غير هيك، عندن شي ما حدا سبقن علي يلي هوي الصفيحة على فرن الحطب، ولا أطيب من هيك صفيحة بتطلع من الفرن دغري وبتاكلوها سخنة مع شوية لبن.

الحلو بهالمحل إنو عندن قعدة جوانية وبرانية، التينن حلوين يعني حسب شو عبالكن، إذا عبالكن تقعدوا بالهوا الطلق فيكن وإذا عبالكم قعدة مكنكنة جوا كمان فيكن، وفي شي كتير مهضوم كمان بهالمحل، عندن مكتبة زغيرة فيها كتب للي عبالوا ينعزل شوي عن العالم.

وإذا عبالكن تحلاية بعد الأكل، عندن قصص طيبة متل البروانيز، الكيك على عسل مع فانيلا، الكيك على موز.

المشروب والكوكتيل بلا ألكول ومليانين فواكة وطعمات الصيفية. وكمان عندن كذا نوع من البيتزا والباستا والبرغر والسندويشات.

يلا صار بدا مشوار على بعلبك!

العنوان: بعلبك
الرقم:522 688 81

شوفوا كمان، هيك أسعار الدخولية على أشهر المسابح والشطوط ببيروت!