كمّونة البندورة، أكلة بلدية من فخر السفرة الجنوبية!

اليوم قررنا نطلع ع الجنوب وندوقكن أكلة من المطبخ الجنوبي اللبناني بتدوخ أد ما طيبة! حوّشنا شوي حبق، مردكوش، نعناع، وجهزنالكن الكمونة لنعملكن أطيب صحن كمّونة البندورة ع أصولو!

Image Source: Malak.dishes on Instagram.

الأشيا البسيطة بتختصر إرتباطنا بالجنوب، متل شجر الزيتون، المجدرة الحمرا، وريحة الكمونة الطيبة. والكمونة خلطة أعشاب تفننوا فيها أهل الجنوب وتميّزوا بطعمتها الزكية، إن كان مع الكبة النية، كبّة العدس، مع البندورة، وغيرها من الأكلات البسيطة المحبوبة بالمنطقة.

كمّونة البندورة، أكلة ما بتفارق السفرة الجنوبية!

ع قد ما بسيطة خبرية الكمونة، ع قد ما بتجمع تراث كامل بلقمة وحدة. كمّونة البندورة بتعبّر عن المطبخ الجنوبي اللي تميّز بالأكلات النباتية، اللي بتعتمد ع مكونات بسيطة من الأرض وكل شي من حواضر البيت.

خلونا نتعلم كيف نعمل كمّونة البندورة!

بتعرفنا الشيف سارة عاصي، وهي بنت الجنوب، ع كتير وصفات لبنانية بلدية، ومن أحبو ع قلبها هي كمونة البندورة. خلونا نخبركن عن الوصفة ع طريقة سارة اللي تعلّمتها من أمّها وستّها:

وصفة الكمّونة:

“لتحضير الكمونة اللي هي خلطة بهارات و اعشاب و خضار و برغل اسمر ناعم: منطحن كمشة بقدونس و نعناع و كم ورقة حبق و مردكوش و عطراية و بصل اخضر و فليفلة و حر مع بهار (او تحويجة) الكبة و ورد مجفف و ملح. منزيد عليهن كيلو برغل اسمر ناعم و منخلطن منيح. منمدن بصينية لينشوفوا و منستعملن دغري او منحتفظ”

وصفة كمّونة البندورة:

” لتحضير كمونة او كبة البندورة: منخلط ٢-٣ حبات بندورة مبروشين مع شوية بصل اخضر مفروم و ملعقة معجون البندورة و زيت زيتون و كم ملعقة كمونة و منقدمن”

هالأكلة بيرافقها عرس جنوبي كامل ع السفرة، بتتقدم مع فراكة اللحمة النيّة (المعمولة مع تحويشة الكبة أكيد)، زيتون، مكدوس، خضرة من الحقلة، والخبز المرقوق البلدي.

خبرونا، مجربين كمّونة البندورة من قبل؟ وصحتين!

شوفوا كمان، كبيس اللوز: اختراع لبناني بشق القلب