صالون زحلة: سافروا للستينات على فنجان قهوة!

فاضي لقهوة؟ بفضي حالي. يسعد صباحك يا حلو على أطيب فنجان قهوة سخنة من عند محل رح يرجعكن للستينات. صالون زحلة متل ما بتقول عنو فيروز “صباح ومسا شي ما بينتسى”.

^{via: rattanhun}

من اللحظة يلي بتفوتوا فيها، رح تنتقلوا لزحلة القديمة. بتشوفوا صور معلقة عالحيطان من زحلة زمان، وجرايد وكتب قديمة، وشمعة بتعطي ضو خافت وريحة حلوة، وكراسي قش عتيقة. شفة القهوة رح تجي على فنجان روميو وجوليت، وكأنو قصص الحب القديمة عم ترجع تحكي. بتقعدوا ع القعدة الحجر وبتتكوا على الركايات وبتسمعوا موسيقى رايقة وصوت فيروز، وبتحسوا بطمأنينة ما بتلاقوها بأي مكان تاني.

^{via: rattanhun}

بس تكونوا بالمنطقة ضروري تزوروا عالقهوة ومش غلط تقصدوهن من آخر الدني لأن عنجد حرزان المشوار. عندن مونة زحلاوية من جميعو كعك العصرونية وترويقة بلدية على الأصول ولبنة وجبنة وزعتر وزيتون وخضرا مشطاح. عندن كمان ببغاء إسمو يويو ولا أهضم من هيك بيحكي معكن وبسلم عليكن بس تجو وبتتصاحبوا معو.

القهوة بيجي معا ضيافة وعندن كعك وحليب للطفل الزغير لي جواتكن.

^{Credits: Amal Nasser}

وإذا ما عبالكن بس قهوة، في كتير إشيا تانية بتسلي عن جد. بتجو بس بدكن بتلعبوا طاولة زهر فرنجية أو محبوسة مع رفقاتكن وبتطلبوا معها فنجان عصير جايي من البستان على الكباية دغري. قهوة لبنانية أصيلة مع ضيافة متل ما ستتاتنا بيقدموها، كعكة طازة وكاسة حليب على الصبح. بتتذكروا الطربوش لي من إيام طفولتنا؟ هون بتاكلوا مع شفة قهوة سخنة فوق الكريما، بيطلع شي روعة.

صالون زحلة، قطعة من التراث اللبناني

تفاصيل الكافيه بيتوتية وقريبة من القلب، من الخزانة المليانة من فوق لتحت بالمونة اللبنانية من مربيات والأعشاب والشايات، للمهوايات والصور اللبنانية العتيقة والجمل الجبلية بكل زاوية من المحل.

رح تشعروا مع كل شفة قهوة بقصة ورا قصة بحكاية ورا وحكاية، كأنكن عايشيين بالزمن الجميل، إيام الستينات، وقت كان الرئيس شمعون يزور زحلة ووقت كانت الصبوحة نجمة الشاشات والمسارح وفخر كل ضيعة بلبنان.

زوروا الكافيه ع معدة فاضية لأنو الأكل عندن بيحمل نفس بيتوتي وفريش كتير. فيكن تروحوا الصبحيات وتطلبوا ترويقة كلاسيكية من بيض عيون وجبنة ولبنة وصاج أو تغيروا جو مع سلطات النباتية وساندويشاتن المبتكرة. وإذا عبالكن تحلاية، في عندن كريب شوكولا وبرواوني وميلك شيك ع فريز لتبوردوا قلبكن.

هالمكان هوي المحل المثالي للأصحاب أو مشاركة حدثان ممتعة أو بس لتهربوا من مشاكلكن. فيكن أكيد تزوروا لحالكن لأن في حدا كتير مهضوم رح يكون ناطركن على القهوة ليسولف معكن ويعرف شو أخباركن، مين يا ترى؟ ما عرفتوا مين بعد، الببغاء يويو الحبوب المهضوم.

شو أكتر شي بميز هالكافيه بلبنان؟ بتعرفوا شو عندن؟ عندن كذا نوع شاي غير لي معودين علين، كل نوع معمول لشي معين، شي لوجع الراس، وشي ليقوي المناعة، وشي للنفخة والهضم، وشي ليروق أعصابكن وشي ليقوي الذاكرة، نقو واختاروا بين تشكيلة واسعة وكبيرة بتنهوا فيها وجبة أكلكن.

عند صالون زحلة، بترجعوا لزحلة إيام الزمن الجميل وبتسرحوا بأفكاركن صوب البردوني والساحة الحلوة وبترتاحوا لو لدقايق أو ساعات.

العنوان: زحلة
الرقم: 661 442 81