٩ بحيرات لازم تزوروهن بلبنان!

بدكن تكزدروا هالربيع بعيد عن صخب المدينة؟ بدكن تتنفسوا هوا نضيف وتغوصوا بأحضان الطبيعة الخلابة؟ لبنان مليان مفاجآت، ومن أحلى مفاجآتو بحيرات ساحرة لي موجودة بكافة المناطق. تعرفوا على هل الـ ٩ بحيرات لي لازم تزوروهن بلبنان.

١. بحيرة تعنايل، البقاع

بحيرة بتستقبل الطيور المهاجرة، والميّ فيها عذبة وجنبها بساتين غنية، بحيرة تعنايل واحة للراحة بقلب الطبيعة. تمتعوا بالمشي أو ركوب الدراجة الهوائية أو الخيل حول البحيرة. استكشفوا دير تعنايل القريب، وتذوقوا أشهى منتجات المحلية من الألبان و الأجبان الطازة.

٢. بحيرة القرعون، البقاع الغربي

هالبحيرة بتشبه الجنة على الأرض، محاطة بالسحر والجبال. إنبسطوا بالمنظر الخلاب وتمشوا على ضفاف البحيرة أو مارسوا رياضة الهايك وخدوا أجمل الصور للطبيعة الخلابة.

٣. عيون السمك، الضنية

لوحة فنية مرسومة بألوان الطبيعة الخلابة، هيدي عيون السمك. المي نقية بتنزل بشكل بحيرة بتحبس الأنفاس. امشوا على طول ضفاف البحيرة و اكتشفوا شلالات المنطقة و المناظر الطبيعية الساحرة.

٤. بحيرة شوان، نهر إبراهيم

هوا نقي وشجر الصنوبر والبلوط، هيدا هيي بحيرة شوان. خوضوا تجربة المشي وسط أحضان الطبيعة و استمتعوا بالهدوء والسلام الداخلي.

٥. بحيرة اليمونة، البقاع

بقلب البقاع، قاعدة بحيرة اليمونة الساحرة. اتنشقوا هوا البقاع العليل و اكتشفوا المحمية الطبيعية الغنية بالتنوع النباتي و الحيواني. المي الصافية رح تأسر نظركن ورح تلاقوا فيها الأسماك الدهبية النادرة.

٦. بحيرة عيون أرغش، بعلبك الهرمل

محمية طبيعية بتحضن بحيرة عيون أرغش وبتحيط فيها شجرات عالية. اعبروا الجسر وتصوروا و استمتعوا بمنظر المي العذبة وشعور الهدوء لي بيغمر المكان.

٧. بحيرات قرنايل، بعبدا

منظر خلاب بيخطف القلب، هيك هني بحيرات قرنايل. خذوا نفس عميق و استمتعوا بالهدوء و سكينة. خيموا تحت سما النجوم، أو اعملوا بيكنيك على مغيب الشمس. استكشفوا كل زاوية من زوايا المنطقة واكتشفوا جمال الطبيعة الخلابة.

٨. بحيرة الكواشرة، الكواشرة

تعتبر مهرب العكاكرة لي بيقصدوها أكتر شي بالصيف ليتفرجوا على الطبيعة الحلوة ويتمشوا ويشوفوا البطات، بتلاقوها عطريق عام حلبا-القبيات، وهيي من السبعينات عم تسقي كل الأراضي الزراعية بالمنطقة، بتشبه واحة بعيدة عن العالم كلو لازم يزورها كل حدا عم بنبش عإستراحة طبيعية.

٩. بنشعي، زغرتا

بحيرة بنشعي الاصطناعية الجميلة محاطة بالمطاعم والكافيهات. هيي مكان رائع للكزدورة وللغدا نهار الأحد مع العيلة وممارسة مختلف النشاطات الترفيهية والمائية متل ركوب الشخاطير والبيدالو وزيارة المعالم السياحية بالمنطقة.

شوفوا كمان، ٧ محلات لتسترخوا بقلب بيروت.