تعرفوا على ضيعة حيطورة وكرخا ومشموشة بقضاء جزين!

من بيروت، بتاخدكن الطريق ع ضهر الرملة، وبتمرقوا عروم، لتوصلوا على ضيعة حيطورة، ضيعة ساحرة بتبعد عن بيروت ٧٧ كم وبترتفع ١١٠٠ متر عن سطح البحر.

هون، بتلاقوا غابات الصنوبر، وبتقدروا تخيموا بين الشجر، وبتستمتعوا بجو طبيعي فريد.

يلي بميز حيطورة طبيعتها الهادية والرايقة وبيوتها التراثية، هلقد بسيطة بس هالقد حلوة.

حتحسوا حالكن دخلتوا عالم جديد أول ما تفوتوا على هالضيعة الرايقة، برموا شوارعها العتيقة، زوروا دكاكينها العتيقة وكلوا مناقيش من أفران الضيعة.

وكمان فيها تاني أكبر غابة صنوبر من بعد بكاسين، بتقدروا تفوتوا لجوا وتاخدوا صور كتير حلوة بتطل على الضيعة.

وحد ضيعة حيطورة بتلاقوا ضيعة مشموشة يلي مش كل الناس بتعرفها، فيها دير عندو متحف مخبى بقلبو أواني نحاس أثرية وقصص عتيقة كانوا بيستعملوها جدودنا. هيدا الكنز المخفي لازم تزوروا لما تجوا عالمنطقة.

^{Credits: Gabyreaidy}

وغير هيك، في ضيعة كرخا المجاورة، يلي بتحوي مزار مار يوحنا المعمدان يلي موقعو بيخطف الأنفاس. وحد الموقع دغري مخبى فرن زغير ومهضوم بيعملكن أطيب مناقيش على الصاج ع طريقة التيتا، شوية مقادير من البيت وحواضر الضيعة.

شفتوا، سمعتوا، واكتشفتوا كل شي، صار وقت الغدا:

تعرفوا على هيدي اللايحة الواسعة من مطاعم جزين يلي كتير قريبة وبتقدم مختلف أنواع المأكولات اللبنانية والعالمية، ضغطوا هون.

خلصنا المعالم السياحية والأكل الطيب، ولنرجع ع حيطورة مين عبالو يروح يشوف مغيب الشمس؟

تجربة الهدوء يللي حتختبروها بغابة حيطورة ما إلا مثيل. تحدثوا مع ولاد الضيعة وتعرفوا عالهضامة الجنوبية، من بعد ما تضيفوا شي فنجان قهوة أو شراب.

وهيك بتكون تجربتكن من غير عالم وما بتكلف كتير وبسيطة بنفس الوقت.

بس إذا عبالكن تضلوا بالمنطقة فيكن تناموا ب Blue Jay Valley وإذا بدكن شي بعد في فخفخة أكتر ما إلكن غير La Maison de la Forêt بقلب غابة بكاسين. تنيناتن عندن مطعم كمان لتستفيدوا ع ترويقة أو حيلا وقت بالنهار وتنايناتن عندن قعدة روعة ومن الأحلام.

Blue Jay Valley: 78 880 088
La Maison de la Forêt: 07 800 222

هالضيع بتحكي حكايات التاريخ، وبتعرض جمال الطبيعة، بتستاهل زيارتكن.

هون، بتنسىوا كل همومكن، وبتعيشوا تجربة مميزة.

شوفوا كمان، شو قصة وادي الجماجم بيسكنتا: وادي الجتت لي ما حدا قدر يوصلوا!