أشهر شخصيات “كيف وليش”: وين صاروا اليوم؟

“أنا الست حشورة بحشر حالي بكل شي”… يا الله هالغنية شو كنا نسمعها نحنا وزغار ونضل نغنيها كل نهار… كيف وليش! مين منا ما بيتذكر هالبرنامج؟ برنامج رافق طفولتنا وعلمنا كتير وضحكنا كتير، من الرسم، للحرف اليدوية، للغات، وحتى الأغاني المهضومة!

قسم كبير من جيل التسعينات ربي على برنامج “ميني ستوديو” والقسم الأكبر ربي على برنامج “كيف وليش” يلي كلنا كنا نعيطلو “ديديه”، ونجتمع كل يوم بعد الضهر ونركض نخلص درسنا قبل ما يبلش “ديديه” لنلحق نحضروا ونجتمع مع الجيران وإخواتنا ورفقاتنا ونتسلى.

_{Credits: Nidaa al Watan}

^{Credits: LBCI}

وين صاروا أشهر شخصيات البرنامج؟

من بعد ما عملنا بحث مدقق عن أشهر نجوم البرنامج، ما قدرنا نعرف كتير عن كل الشخصيات لأن قسم كبير منن اختفى وما رجع أبداً بين على التلفزيون، وبالمقابل قسم لمع وصار من أبرز جوه الكوميديا وحتى الدراما بالبلد، وهيك منخبركن.

١. ديزيريه فرح (ديديه)

^{Credits: eliktisad}

مقدمة البرنامج، رمز البراءة والطفولة، بعدا علقانة بذاكرتنا وبتضل لو قد ما كبرنا! بعد ما خلص برنامج كيف وليش، قدمت ديزيريه برامج تانية متل “بيغ بيت” و “بيت بيوت”. بعام 2004، اعتزلت ديزيريه التلفزيون وركزت على حياتها الشخصية. وسنة 2006، رجعت ديزيريه ع التلفزيون بعد حرب الجنوب حيث انتقلت للبرامج الإنسانية ومنها “نحنا لبعض” لي حاولت تساعد في كل ضحايا الحرب.

٢. كارين رزق الله

جسدت شخصية الست حشورة وانعرفت بغنيتها الشهيرة، وبعد سنين صارت نجمة من نجوم لبنان، كاتبة وممثلة ناجحة. بعد انتهاء برنامج كيف وليش، اتجوزت كارين من الممثل فادي شربل وعملو série مسلسلات كوميدية يلي انشهرت شهرة كبيرة وحبوها الكبار والزغار من “مرتي وأنا”، “مرتي وبنتي وأنا” ل “عيلة ع فرد ميلة” وصرنا ننطرن سنة ورا سنة قبل ما ينفصلوا بعد سنين من الزواج والحب وتقرر كارين تنتقل لعالم الكتابة والتمثيل. كتبت قبل انفصالها أول مسلسل لإلها يلي هوي “حلوة وكذابة” ويلي انعرض على ال MTV وحقق نجاح كاسح وكان نقلة نوعية لكارين ورجعت كتبت ولعبت دور البطولة بالعديد من المسلسلات الرمضانية الناجحة، متل “قلبي دق”، “مش أنا”، “لآخر نفس”، و “مشيت”.

٣. فادي شربل

جسد شخصية جوجو الكلون، وهوي اليوم ممثل كوميدي معروف، تجوز من كارين رزق الله وكمل مشوارو الكوميدي من بعد “كيف وليش” مع كارين بسلسلة “مرتي وأنا” يلي كانو الكل ينطروها، كبار وزغار إلى جانب فيلم “مدام بامبينو”. ورجع أخد منحى كوميدي مختلف خاص في من دون كارين مع برنامج “كتير سلبي شو” ومن بعد انفصالو عن كارين بقي فادي منفرد عن زوجتو السابقة بنشاطاتو التلفزيونية الكوميدية. مؤخراً صار عم بقدم برنامج إذاعي على صوت الغد وعطول بشارك بمسرحيات وسهرات كوميدية.

٤. جورجيت زوين

جورجيت زوين يلي لعبت دور رنا بكيف وليش كمان رجعت شاركت ببرنامج الأطفال الشهير “ميني ستوديو” وما قدرنا نعرف كتير عن نشاطاتا الأخيرة.

٥. زينة الشماس

زينة يلي لعبت دور “سامي الثرثار” صارت كاتبة ومخرجة مبدعة وناشطة إجتماعية بتقوم نشاطات بمناسبة حلول الأعياد والنشاطات يلي لإلها بتكون موجهة للأطفال وكمان عطيت دروس مسرحية للأطفال، يعني فينا نقول بعدها بنفس المجال وعم تبدع أكتر وأكتر.

نجوم “كيف وليش” سطروا أجمل ذكريات طفولتنا، وعلمونا وفرحونا، وخلقوا فينا ذكريات ما بتنتسى رح ترافقنا طول عمرنا!

شوفوا كمان، أشهر القصور الأثرية بلبنان!