٧ مطاعم أرمنية لازم تجربوها بلبنان!

زيارة المطاعم الأرمنية تجربة فريدة مننصحكن تعيشوها، دوقوا الأطباق يلي اشتهرت فيها أرمينيا واصطحبوا أحبابكن وأصحابكن على أحد هالمطاعم المميزة.

١. أونو بيسترو، بدارو

إذا عم تفتشوا عن تجربة أرمنية أصيلة، الجواب هوي مطعم أونو بيسترو ببدارو. هيدا المطعم مميز بقعدتو الدافية اللي بتخليكن تحسوا وكأنكن قاعدين بقلب بيتكن، وبالأطباق التقليدية اللذيذة اللي بتحضرها إيدين حنونة. من اللحظة اللي بتدخلوا فيها، رح تنسوا حالكن وتركزوا عالأكل الشهي. ضروري تجربوا طبق المانتي عندن، وأكيد ما رح تندموا لو ختارتوا الدولنا مع لبن كمان. مش بس هيك عندو أطباق لبنانية بيتيوتية كمان!

الرقم: 203 383 70

٢. مايريغ، الجميزة

عشاق الأكل الأرمني الأصيل، فيكن تلاقوا طلبكن عند هالمطعم اللي موجود بالأشرفية. من لحظة دخولكن على المطعم، رح تتعرفوا على شغفن بالضيافة الأرمنية الممزوجة بالطعم الأصيل، كل شي هونيك بيحكي عن عراقة هالمطبخ، من الأكل الشهي للجو الحلو، وصولاً للخدمة الممتازة. ما تفوتوا عليكن طبق المانتي مع اللبن عندن، لأنها فعلاً بتخلي نهاركن مثالي وغير هيك الحلو عندن من غير عالم.

الرقم: 227 228 03

٣. باتشيغ

هيدا المطعم قصتو قصة، معروف بين الناس لأسباب كتيرة، أهمها إنو بيقدم أطيب الأكلات الأرمنية المحضرة بكل عناية وحب. غير هيك، عطول عندن أفكار جديدة وابتكارات مميزة بالأكل وضروري كمان تجربوا عندن الbrunch لي غني بتشكيلة من الأطباق الزغيرة المختلفة، بهالطريقة رح تقدروا تكتشفوا أصناف جديدة وتقليدية من المطبخ الأرمني وتاخدوا فكرة عنو. نصيحة منا، ما تنسوا تطلبوا صحن العثملية مع فنجان قهوة على التحلاية، لأنو طعمتها فعلاً مميزة.

السيتي سنتر: 307 444 70
الزيتونة باي: 654 135 70
برمانا فيلا: 994 766 70

٤. غزار

هالمطعم مشهور من زمان، عارف يرضي الزوار ويوصلو عالم المذاق الأرمني الأصيل يعني بتحسوا حالكن كأنكن قاعدين بشي مطعم ب Yerevan. فيكن تشاركو التجربة الممتعة مع شريككن عالطاولة وتتغدوا أو تتعشوا بطريقة مميزة. نصيحة منا: ضروري تجربوا الساريبورما أو كبب الصاجسة الطازة مع الجبنة وطلبوا معن خبز مقلي. كمان فيكن تطلبوا طبق السجق مع بيض، أو حتى تروحوا لتدوقوا الأطباق السحرية عندن متل كببب الكرز وكبب اللبن وطبق السوبوريك. وبالنسبة لللي عم يفتشوا عن جو أكتر خصوصية، فيكن تروحوا ع فرعن التاني بأنطلياس.

أنطلياس: 767 772 71
برج حمود: 098 290 71

٥. أوهانس

من أجمل المطاعم الأرمنية بالبلد! عشاق النبيد الأصيل والعرق البلدي، فيكن تلاقوا رغبتكن ب “أوهانيس” اللي موجود بعدة مناطق. هالمطعم مش بس متخصص بالأكل الأرمني وبيعمل قصص يدوية متل المربيات وكبيس التوم وغيرن، كمان المانتي اللي بيقدموها بتجنن! ما تفلوا قبل ما تطلبو البوظة ع قشطا أو تتوم انوش ومعمول الجبنة للتحلاية بعد وجبتكن اللذيذة. بالمناسبة، قعدتن كتير خرج موعد غرامي وهيك بتجربوا مطبخ جديد سوا وبتتصوروا. جربوا شي جديد واستمتعوا!

البوشرية: 555 889 01
البترون: 555 899 76
جونية: 555 173 03

٦. بادغير، برج حمود

لـ “بادغير” قصة خاصة، لإنو بيقدملكن تجربة فريدة من نوعها. هونيك رح تدوقوا أطباق مميزة بتحضير تقليدي، بتحسوا حالكن كأنكن واقفين ورا باب المطبخ ومراقبين الشيف وهوي وعم بيشتغل. هوي بيشبه بيت أرمني عتيق، بسفركن على أرمينيا وبالزمن لورا وبجبلكن عادات البيوت الأرمنية العتيقة، والأكل بيتوتي والطبخات ولا ألذ من هيك وما فيكن إلا ما تقضوا نهار كلو هونيك قد ما الجو حلو.

الرقم: 235 652 03

٧. سيزا، مار مخايل

من أجمل وأهضم المطاعم المخباية بشوارع بيروت بيجمع بين الأكل اللذيذ والأجواء المميزة. هالمطعم جوهرة مخفية يعني رح تحسوا قريب لقبلكن من أول ما تفوتوا. من اللحظة اللي رح تختاروا فيها طاولتكن، رح تتعرفوا عى شغفن بالضيافة وعراقة المطبخ الأرمني. كل شي هونيك بيحكي عن قصة وخبرة طويلة، ورح تدوقوا أكل تقليدي بيتحضر بطريقة عصرية ومتجددة. عيشوا هالتجربة المميزة واستمتعوا بأشهى الأطباق الأرمنية مع حبيبكن!

الرقم: 257 251 03

شوفوا كمان، ٦ مطاعم مكسيكية لازم تجربوها بلبنان.