زوروا مع ولادكن متحف الشوكولا المهضوم بلبنان!

عم تفتشوا علي تجربة ممتعة ولذيذة و تعليمية كمان مع ولادكن؟ أو تجربة رومانسية ع عيد الحب بعالم من الشوكولا؟ لقينالكن المشوار المناسب! مشوا معنا نزور ونكتشف مع بعض متحف الشوكولا الموجود ببشامون! 

زيارة متحف Choco Story Beirut بتناسب الكل، الكبار والزغار وكل حدن بيحب الشوكولا! بيقدموا بهيدا المتحف تجارب مميزة ومتنوعة متل زيارة متجرن الخاص للحلويات اللي عندو أفضل أنواع الشوكولا. و بتجربوا قصص مميزة متل علب  شوكولا اللي طولها نص متر، أو أنواع مميزة من الكيك مع تقديم إستثنائي، عدا عن شوكولا مصنوعة بأشكال وقوالب مهضومة. 

كمان بتشمل جولات تعليمية بقلب المتحف بتعرفكن ع تاريخ الكاكاو، أهميته، وأصلو، وتطور مراحل صناعة بودرة الكاكاو، و بيمرقوا ع حضارات اللي أثرت فيه متل حضارة المايا. 

بيعملوا ورشات خاصة حتى تتعلموا صناعة شوكولا على إيديكن مع المحترفين، و بيستخدموا الشوكولا البلجيكية! 

بتتعرفوا ع أنواع القوالب، و الحشوات اللي بتحبوها، كيفية تزيين وكل شي ممكن يخطر عبالكن. وهالورشات في منا للكبار وللزغار وتعتبر تجربة مسلية وشهية! 

وهلق عاملين بشهر الحب ورشة رومانسية لصنع الشوكولا “Love Bite Lab” من 10 حتى 18 شباط. هالورشة خاصة بالعشاق وبتتضمن صنع الشوكولا، بوكيه ورد، وهدايا من مستحضرات للجسم معمولة من الكاكاو الطبيعي. 

بتلاقوا المتحف ع الطريق الرئيسي ببشامون، بشارع اليانار، بيفتحوا من الإتنين للأحد من الساعة 9 الصبح حتى 6 المسا، و الدخولية للكبار والزغار 6$ . 

فيكن تابعوا Choco Story على الإنستغرام هون. للحجز أو المزيد من المعلومات اتصلوا على 616 868 78.  

حبيتوا مشوارنا ع متحف الشوكولا بلبنان؟ 

شوفوا كمان،٧ محلات تغطسوا حالكن فيهن بالشوكولا بعيد الحب!