يا ويلي ع اللبنانية، صار في سوشي ع لحمة!

انتو من محبي اللحمة أو السوشي؟ السوشي وحدة من الأكلات اللي عندها شعبية بالعالم، بس لقينالكن محل بالكسليك بيعملوا سوشي ع لحمة، ونحنا قلنا منخبركن عنو.

The Grill Spot هو محل شاورما لبناني بالبوليفارد كسليك، بيقدملكن كل الأكلات المشوية المفضلة عندكن و اللي بتفرفح بطنكن ع المزبوط. بيقدم الأكل ع  طريقة أكل الشارع اللبناني، و عندو المنيو فيها كتير من الخيارات الشهية والدسمة. بتلاقوا كل السندويشات اللي بتحبوها و كمان بيقدموهن ع شكل المازة اللبنانية.

^{المصدر: باس فود.}

مع انو كتار بيحبوا يقصدوا المحل لياكلوا سندويشات الطاووق، أو مشاوي لبنانية مع حمص وحر. بس اللي جذب انتباهنا هو طبق السوشي ع لحمة.

خلونا نعرّفكن على نسخة السوشي لمحبي اللحمة. هالمكان بيعملوا سوشي من لحمة الغنم و بلفوها ع شكل رول، ومن فوق بيحطوا صوص البيستو وصلصة الفلفل الحار، مع ورشة من الفستق المطحون. هيدا الطبق بيقدر يكون تجربة حلوة لرفيقكن اللي ما بيحب السوشي. 

ممكن مش الكل بيحب السوشي أو طعم السلمون، بس نحنا مأكدين انو كل اللبنانية بيحبوا طعمة اللحمة المشوي خصوصي مع صوص الحر والفستق المميز، يا لطيف ألطف. 

كمان، إذا كنتوا عم تدوروا على أطباق  مميزة عندن تجربوها بتقدملكن نفس التجربة الاستثنائية، لازم تجربوا هالطبق المميز: من أول نظرة ممكن تفكروها كنافة، هي متلها بس مع حشوة لحمة مشوية، جبنة دايبة، الفطر، مع الفلفل وكمان رشة فستق. 

محبي اللحمة، خبرونا شو رأيكم بهالمطرح وإذا جربتوه من قبل، عطونا رأيكن بكل صراحة.

بتحبوا السوشي ع أصولو؟ شوفوا قسم سوشي على موقعنا.