أنواع الزملا لي بتلتقوا فيهن بكل شغل بلبنان!

خلص العيد وخلصوا الفرص ورجعنا على الشغل، وأكيد رجعنا نشوف الزملا بالشغل كل يوم. خلونا اليوم نخبركن عن أنواع الزملا بالشغل يلي رح تقضوا معن حياتكن كل يوم وكل هالسنة.

١. المتفلسف

متعب كتير وبدو يتفلسف بكل شي ويحشر حالو بكل شي وبجبلكن شغل ما إلو عازة

٢. يلي مأخر عطول

عطول علقان بعجقة وكل يوم مأخر وبتلاقوا أول واحد بفل ركض بس يخلص الدوام

٣. يلي دالق قنينة الريحة على حاله

الكل بشم ريحتو من بعيد هوي وعم يمشي

٤. يلي عامل حالو مشغول

كل ما تحكي بقلك مشغول وعندي meetings ومش ملحق وهوي طقيق حنك

٥. يلي تمو ما بيهدا

كل نهار أكل وبدو يمد سفرة مع الكل وديليفيري رايح وديليفيري جايي

٦. مدمن التلفون

قاعد بنهارو على التلفون أكتر ما قاعد يشتغل

٧. يلي بساير المدير

بقضيها مزح وتنكيت معو ليزبط أمورو وبتلاقوا كل أمورو زابطة

٨. يلي بقضيها نق

كل نهار نق عن الحياة بلبنان وما بيعمل شي غير نق

٩. يلي جايي يقطف

ما في يقعد بلا ما ينغرم بشي حدا بالشغل ويصير يفكر في كل النهار

١٠. يلي بيسأل أسئلة ما إلها عازة ليبين إنو جدي

وبصير الإجتماع بدال ما ياخد ساعة بصير بدو ساعتين ليخلص

١١. الموظف المثالي

جالط الكل بالمكتب، دايماً على الوقت وبيعمل شغلو على الميلي، ونموذج بقارن في المدير كل الموظفين

١٢. السرسار

بقضيها لتلتة حكي كل نهار وبلهي الكل بالمكتب على مواضيع سخيفة

١٣. يلي أنجق بيجي على الشغل

بقضيها صاخن ومريض وعم بيموتوا قرايبينو وبس يجي بربح جميلة الموظفين إنو عم يجي على الشغل

إذا عنكن أنواع زملا غير يلي ذكرناهن، خبرونا عنن بالكومنتس.

شوفوا كمان، ١٠ شغلات رح تفهمها إذا كنت أزغر ولد بالعيلة بلبنان!