٦ سناكات ضروري تجربوهن بجونية

ضربكن الجوع إنتو وبنص جونية ومش عارفين وين تاكلوا؟ خلينا نعرفكن على ٦ سناكات بيعملوا قصص سريعة وطيبة بهل المنطقة ضروري تجربوهن.

١. جانكباكس Junkbox، الكاسليك

المينو غني بالمأكولات السريعة لي بتتنوع بين الساندويشات والبرغر مع صوصات مختلفة. كل شي عند هالمحل ملغوم بالجبنة، البرغر، البطاطا، الدجاج والسندويشات، ريحة ومنظر شي رهيب!

الرقم: 222 970 76

٢. الحاج نصر، زوق مصبح

جوهرة بيروت وصلت على جونية! بتلاقوا عندو ساندويشات على أنواعها من الساندويشات العادية متل الطاووق والدجاج والبطاطا والروستو والسجق والكفتة، للإختراعات الخاصة بالمحل متل ساندويش التابلة النية لساندويش النخاع مع كبيس، للبيض وغيرن كتير.

الرقم: 071 330 01

٣. ذا سناك The Snack، زوق مكايل

من أشهر السناكات بالمنطقة، والساندويشات عندو كبار ومدعومين منيح، والقريب والبعيد والزغير والكبير بيطلب من عندو. إشتهر The Snack بالساندويشات لي عندو، البرغر وأكتر شي ساندويشات المشاوي الغير شكل لي بضيف عليها لمستو الخاصة.

الرقم: 960 224 09

٤. فلالفل جوزيف زينون، زوق مكايل

من أكتر المحلات المعروفة من أهل المنطقة، وخاصةً من عشاق السهر لأن بيفتح بالليل. اللقمة عندن طيبة كتير وغنية، مش بس بيعملوا ساندويشات فلافل، بيعملوا كمان ساندويشات شاورما ومشاوي ومعروف إنو بحط شرايح لحمة وقطع دجاج كبيرة بالساندويشات، خبزتو طيبة وعندو صوصات غير شكل.

الرقم: 476 444 76

٥. البشاوات، جونية

بيعمل ترويقة وغدا وعشا بالعجين! وكمان بتلاقوا عندو برغر بالعجين وسلطات. بيخبزلكن بيتزا، فطاير وحتى بحضرلكن تحلاية بالعجين من نوتيلا وموز. الدجاج بالعجين معرمة منيح ومحشية مننصحكن تجربوها لأنو من إختصاص المحل.

الرقم: 783 723 81

٦. در كفتا، كاسليك K-Square

متل ما إسمو بيدل، بيعمل أطيب كفتا بالبلد! عندو كمان مختلف أنواع الساندويشات بالفرنجة لي بيستحليها قلبكن بس ما في شي بضاهي الكفتا لي بيعملها. بيدهن الكفتا على شقفة خبزة بالطول وبالعرض، بيرجع بيزيد مايونيز وشقف بندورة وكبيس وهيك بتتحمص الساندويش وبتتحمر الكفتا على الهدا!

الرقم: 610 101 81

خبرونا، حبيتوا هل سناكات بجونية؟

شوفوا كمان، ٥ محلات بيعملوا أطيب حلاوة الجبن بلبنان.