أطيب محلات اللحم بعجين ببيروت

فاتحة نفسكن على اللحم بعجين؟ صراحة ما بتتاكل اللحمة وين ما كان وعند مين ما كان لهيك قررنا اليوم نعرفكن عمحلاتنا المفضلة ببيروت.

١. فرن مرشاق، الجميزة

“من أول دخولو شمعة ع طولو”، هيك بقول المتل اللبناني الشهير وهل متل بينطبق على مرشاق لي من أول ما نزل ع بيروت وهوي مش عم بلحق ع الزوار. منقوشة اللحم بعجين عند مرشاق كل شي فيها طيب، من العجينة الروعة، للحمة الطرية والشهية ولي مغطسة بالحامض والبهارات والخضرا ودبس الرمان وغيرها من المكونات السرية!

الرقم: 060 444 01

٢. لحماجون، الجميزة

في حدا أشطر من الأرمن باللحم بعجين؟ بيتفننوا بتحضير منقوشة اللحم بعجين عن باقي المحلات وبزيدوا عليها لمستن الخاصة… طحين وعجين ولحمة ونكهات أرمنية ما بتخلص. في عندن أكتر من منقوشة لحم بعجين وأكتر من طعمة. جربوا وشوفوا الفرق!

الرقم: 576 135 70

٣. فرن طقوش، الحمرا

العيران شو بدو؟ أكيد منقوشة لحم بعجين طازة وسخنة طالعة من الفرن دغري ع البطون. لما تقرروا تروحوا عند طقوش، عملوا حسابكن تروحوا معدتكن فاضية لأن لي ناطركن حرزان! بقدم أشهى اللحم بعجين والمعجنات وهوي عبارة عن فرن زغير ومهضوم بالحمرا. المهم نخبركن إنو فيكن تاكلوها مع دبس الرمان وحامض وتزيدولها شوية حر وكم قطعة رمان ورشة نعنع لتستمتعوا بكل كدشة على الآخر. وحتى فيكن تاكلوها بالمشطاح للي قلبن قوي!

الرقم: 040 328 76

٤. صاج بيروت، الجميزة

مين بحب الصاج أكتر بكتبر؟ هل محل هوي كنز بالجميزة بيعمل كل مناقيشكن المفضلة على الصاج مع قرشة زغيرة. منقوشة لحم بعجين رق الورقة، أطيب غدا مع حامض ورشة ملح وحبات كبيس. إذا بدكن تنبسطوا بأكلتكن المميزة على الآخر ما عليكن إلا إنو تضموا العيران الطازة لوجبتكن.

الرقم: 937 733 03

شوفوا كمان، ٤ محلات بيعملوا بيتزا بيتوتية بلبنان.