٥ محلات رح تحسسكن إنكن سافرتوا برات لبنان

اليوم وكل يوم بيجي عبالنا نترك الدني كلا ونسافر على شي محل بعيد وننسى كل مشاكل البلد وهمومنا الشخصية بس السفر معقد ومكلف بكتير أحيان وما فينا نترك أشغالنا وعيلنا بسهولة، بس بيبقي بلبنان محلات فيكن تعيشوا فيها تجربة سفر وراحة واتسجمام من دون ما تسافروا وتبعدوا كتير.

١. جزيرة روكا Rocca Islands، حامات

مطرح ما الجبل والبحر بيتلاقوا بكون إسمها الجنة على الأرض. روكا مارينا من أجمل المنتجعات بلبنان، بقدم للزوار اختبار جديد وغريب بنفس الوقت مع شوية فخامة. هل محل بيشبه جزيرة لحالا، قعدة على أنضف شط بلبنان وبتطل على أعلى جبل بالبترون لتخلي قلبكن يدق من أول لحظة. لمحبي الرياضات البحرية فيكن تستمتعوا هون بالغطس وال jet ski وغيرها. أما الأكل فهوي تجربة جديدة وغريبة بحد ذاتها، رح تلاقوا الطاولات والكراسي بالمطعم مغطسين بالمي، هيك بتقعدوا بتاكلوا على رواق وبتغطسوا إجريكن بالمي متل بالأفلام. فيكن كمان تناموا عندن وتشوفوا أجمل مغيب للشمس من ورا البحر والجبل.

الرقم: 444 714 81

٢. ياماس، أنطلياس

لي بحب اليونان كتير ومش قادر يسافر، منبشركن إنو إجت اليونان لعندكن بكل جمالها وبأكلها الطيب وموسيقتها. هيدا المطعم هوي تجربة يونانية أصيلة رح تنقلكن على جزيرة سانتوريني من اللحظة لي بتوصلوا فيها، تماثيل الآلهة الإغريقية معبايي المكان، الموسيقى اليونانية الساحرة كمان، الديكور المتوسطي والمزخرف، الورود والياسمين وريحة البحر وعطر الورد والفل متلا الدني… عدا عن الأكل اليوناني الساحر والمشروبات اليونانية على أنواعها. بهل مطعم رح فيكن تسافروا على اليونان وتعيشوا الجو اليوناني بكل شي في وأكتر شي رح يعجبكن فرق الرقص اليونانية التراثية لي بضل عم تبرم حوالا الطاولات على البيستا والكل في يشاركها الرقص وأكيد ما بدكن تأفوا التجربة اليونانية الأجمل والأهضم: تكسير الصحون وقت الرقص على أنغام الزوربا.

الرقم: 352 030 03

٣. نوماد نايتور أند نورتور Nomads Nature and Nurture ، سرجبال الشوف

هل منتجع عبارة عن بيوت خشب معلقة بالشجر رح تاخدكن على الغابة الاستوائية من خلال كل شي رح تشوفوا حواليكن… الشجر مغطى كل المكان، الهوا النقي، المي والشلالات الطبيعية وصوت العصافير ومنظر الخضار يلي بفرفح القلب. كل شي رح تجي عينكن علي هون رح يريحلكن نفسيتكن ونظركن لأن التوتر ما بشيلوا غير الطبيعة وصوت المي والمساج الناعم والقعدة الرايقة. رح تلاقوا تخوت ومراجيح طايرة فوق الوادي والشلالات وتحت النهر الجاري. فيكن تعيشوا تجربة التدليك واليوغا بقلب الطبيعة مع الموسيقى المكسيكية لي رح ترقص بدينكن على صوت المي… أما الأكل فإلو طعمة تانية بنص الغابة ومع الناس لي بتحبوهن ومحضر بحب وإهتمام كبير. النومة ما فينا نخبركن قدي رح تكون مريحة، بيكفي إنكن بقلب الغابة مبورد قلبكن بقلب بيوت الخشب لي مرتبة ونضيفة كتير وفيها كل شي وأحلى منظر طبيعي.

الرقم: 709 370 76

٤. بيت كاتالبا Catalpa Home، بيت الدين

أكيد شفتو كل شي بلبنان وعشتو كل شي بلبنان بس على الأكيد بعد ما عشتوا تجربة البيسين بقلب أوضة النوم… هل حلم صار حقيقة بمحل واحد يعتبر من أجمل وأغرب بيوت الضيافة بلبنان. بيتميز كاتالبا بوجود بيسين بقلب أوضة النوم ولي عبالو بيرخيها بقلب المي وبيتفرج على شي فيلم هوي ومغمور بالمي من كل الميلات. بيتمتع بجنينة بتطل على مناظر طبيعية خلابة وبقدم ترويقة تحت الشجرة الصبح. تجربة بتستاهل تعيشوها ولو لمرة وحدة بحياتكن بس لأن رح تخليكن تحسوا حالكن بشي فيلم من الخيال وكأنكن مش بلبنان، بشي جزيرة بعيدة عم تغنجوا حالكن مع حدا كتير بتحبو.

لتعرفوا أكتر عن هل محل اضغطوا هون!
الرقم: 089 093 03

٥. فينيسيا، سن الفيل

يمكن عند الأغلبية تعتبر إيطاليا بلد الحلم لي منحب نسافر علي ونعيش حياتنا في من ورا أكلن الطيب، تاريخن الحافل، تراثن الكبير وجمال المي والعناصر الطبيعية لي في ومن ضمن هل عناصر منذكر مدينة فينيز الطليانة لي غرقانة بالمي ولي الكل بيحلم يروح رحلة رومانسية بقلبها على منتن شخطورة زغيرة وياخد أجمل الصور وهلق صار فيكن تعيشوا هل شي بقلب هل مطعم بلبنان. أول ما توصلوا علي بتحسوا حالكن صرتوا بVenice، وهيدي تجربة مهمة لكل مين ما قدر يسافر هالسنة. بتفوتوا على المطعم وبتشوفوا المي عم تجري وشخطورة، الموسيقى الحلوة وألوان الحب والغرام ناطرتكن على طاولة مليانة أطباق إيطالية كلاسيكية. مكان مثالي لقعدة رومانسية مع الحبيب، فيكن تستمتعوا بوجبتكن بالقعدة جوا، أو على التراس بالهوا الطلق لتلقوا نظرة على قنوات المي والجسر والشخطورة، أو حتى تطلعوا بقلب الشخطورة وتعملوا كزدورة بالمي وتعيشوا لحظات رومانسية.

لتعرفوا أكتر عن هل محل اضغطوا هون!
الرقم: 540 516 01

شوفوا كمان، من سانتوريني ع أنفه: رحلة ممتعة على بيت ضيافة من الأحلام.