رومانسية وغرام: مشوار على أجمل المطاعم على البحر

كمشوا حبيبكن أو حبيبتكن وتوجهوا على واحد من أجمل المطارح على البحر!

١. بساري Psari أبو الفوز، شكا

شكا كلها بتحكي عن أكلات أبو الفوز، مافيكن تقطعوا من حدو وما تاكلوا عندو أطيب مأكولات بحرية وسمك لي مصيد طازة، بيتميز هالمحل بقعدة على البحر دغري بتجذبكن من أول نظرة. ومش بس هيك كمان بقدم أشهى أطباق المازة اللي هني التبولة والفتوش والحمص والبتنجان والبطاطا الحرة وغيرها من أطيب الأكلات اللبنانية.

الرقم: 674 542 26

٢. مرشاق على البحر، البترون

هالمطعم المميز اللي حافظ على التراث والتقاليد البترونية، قصتو أكبر من مجرد مطعم هوي أشهر مطاعم البترون وصار معلم من معالمها، بزوروا اللبنانيين من مختلف المناطق لياكلو أطيب المأكولات البحرية لي مشهور فيها ومش بس هيك وبيقصدوا كتير من السواح الأجانب ليتعرفوا علي ويدوقوا أطيب أكل. غير هيك القعدة عندو بتطير العقل خاصة وقت المغيب بتحسوا حالكن ضايعين بقلب البحر.

الرقم: 622 633 76

٣. غريكو Grecco، جبيل

من سحر اليونان رح تنسحروا بقلب منطقة جبيل الأثرية عند غريكو لي رح يستقبلكن على صوت موج البحر. قاعد بقلب البحر ومغمور بالمناظر الخلابة والأثرية من كل الميلات. هالمطعم بيتمتع بخبرة راقية بمجال المطبخ، و بقدم أشهى الأطباق اليونانية من الموساكا والأسماك والسلطات والفيتا غالوري وصولاً للمأكولات البحرية والبيتزا اليونانية و غيرها من المأكولات الغربية والمتوسطية.

الرقم: 605 330 76

٤. أشويندا Oceanda، الصفرا

بيستقبلكن بقلب البحر دغري… بتحسوا حالكن ضايعين بشي جزيرة والهوا البحري وصوت المي محاوطكن. بقدم مأكولات بحرية بتاخد العقل، هل مطعم الرائع هوي حلم كل حبيبين. فيكن تستمتعوا بالأجواء الرومانسية مع السمك الشهي وتقضوا ليلة على البحر، كل لقمة قريدس أو كالاماري رح تبعتكن على رحلة ممتعة على الجزر مع حبيبكن.

الرقم: 047 237 70

٥. مطعم ومنتجع الفنار، صور

جوهرة مخفية بقلب مدينة صور الفينيقية، هل بقعة على البحر رح تجذبكن دغري. بصرف النظر عن القعدة على البحر الساحرة، بيقدم مطعم الفنار تجربة طعام بحري أصيلة ومميزة. مش بس هيك، بيعملوا كمان ترويقة بحرية غير شكل يلي هيي تجربة جديدة وغريبة من نوعها بلبنان – خدوا حبيبكن لقعدة ممتعة على التراس.

الرقم: 111 741 07

شوفوا كمان، تعو نزور أطيب المطاعم بفاريا.