وين فيكن تلاقوا أطيب محل بوظة بلبنان؟ خلينا ندلكن

في ناس بتحب تاكل بوظة كل يوم وكل ساعة وكل دقيقة وكل تكة ونحنا منن.

بس البوظة ما بتنجاب من وين ما كان وما بتتاكل إلا عند أطيب محل بوظة بكل لبنان.

بقلب بلدة بعبدات الخلابة، القاعدة بين جبال لبنان الشامخة، في جوهرة مخفية رح تاخدلكن عقلكن إذا كنتوا من عشاق الآيس كريم بالنكهات المختلفة…. زرنا لاتيلييه دي غلاس L’atelier des Glaces لأول مرة وكانت تجربة من العمر.

لتوصلوا على بعبدات من بيروت بدكن تمشوا شوي بالسيارة بس رح تكون أحلى كزدورة بالعالم.

بتوصلوا بيستقبلكن صاحب المشروع، شربل، مهندس اتصالات شغوف مغروم بعالم البوظة، سافر من بلد لبلد ونقل معو كل نكهات البوظة الطيبة من آخر الدني على لبنان.

حتحسوا حالكن بالبيت أول ما تفوتوا. لي بميز L’atelier des Glaces هوي الشغف والفن لي ورا كل نكهة وطعمة. بلش هل محل سنة 1982 وصار يكبر ويكبر شوي شوي ورغم كل الصعوبات وبعد تسكير بسبب الأزمة رجع وقف على إجري وعم يعمل أطيب بوظة ويخترع نكهات جديدة.

بحضروا البوظة المعمولة على الإيد، بالإضافة للصوصات اللذيذ. أحلى زيارة بعد الضهر عند L’atelier des Glaces!

هل محل بحضر نوع البوظة level 5 لي موجود بس ببعض البلدان الأوروبية وما بيشبه الأصناف التجارية الموجودة بالسوق ولي كلا سكر.

على هل سيرة، خبرنا شربل سر إنو لما تكون البوظة معمولة من كمية عالية كتير بالسكر بتدوب دغري بس تنشال من البراد وما بتعود بضاين ولا نتفة، أما البوظة المشغولة مزبوط ولي بحضروها هني من كل قلبكن ولي بتاخد معن شغل من 3 ل4 إيام كل نهكة، بتطلع النتيجة بتعقد وغير هيك بتنترك السكوب 10 دقايق تحت أشعة الشمس وما بتدوب أبداً (وهاي بعد تجربة). أما النهكة لي فيها مش معقول شو طيبة وسلسة ومنا تقيلة أبداً، ما بتحسوا بالحلاوة الزايدة ولا بالسكر.

عندن كل النكهات، التقليدية والمبتكرة بكل فن وشغف. دقنا آيس كريم الشوكولا بالويسكي الشهيرة عندن، مزيج سماوي بين الكاكاو الغني وقطرات الويسكي اللذيذة. صراحة كتير طيبة وأبداً مش دلعة ولا تقيلة بتدوب وبتتمرمغ بتمكن بدون ما تحسوا.

على فكرة في سر بهل محل غريب عجيب، بتاكلوا كتير وما بتحسوا إنو عم تاكلوا، كل شي خفيف وطيب كتير بنفس الوقت متل السحر لأن البوظة معمولة على الأصول وبدون مواد حافظة.

جربنا نكهة المانغو، المندرين، التوت الأحمر، التفاح، الفريز وما قدرنا ما ندوب مع كل لقمة وكل ملعقة. شي عنجد مخيف! ما فينا ننسى طعمة آيس كريم الفستق المحمص، لي هيي عبارة عن خليط بين كريمة الفستق والنكهة المقرمشة.

مش بس هيك، لاتيلييه دي غلاس بقدم مجموعة نباتية من الآيس كريم، محضرة بعناية باستخدام الدهون والألياف النباتية، هل شي يعني الكل فين يستمتعوا بلذة الآيس كريم بدون ما يحسوا بالذنب. كمان بحضروا أصناف organic، بيستعملوا فيها بس أجود أنواع المكونات المحلية، وتعتبر البوظة لي بقدموها خالية من الغلوتين، وهل شي بخلي كل حدا عندو حساسية على الغلوتين يستمتع بكل الطعمات. وصراحة السكر لي فيها ما بيتخطى ال22% بكل طعمة على عكس السوق لي أغلب الطعمات في مكونة من سكر وبس مخلوطين مع شوية ملونات.

هل محل مش بس بقدم بوظة لكل الناس لي بحبوا يبوردوا قلبن، بيستلم كمان جميع مناسباتكن الخاصة وبيعمل أطيب الأصناف والصوصات!

لتجربة سحر لاتيلييه دي غلاس، فيكن تزوروا المحل ببعبدات أو تطلبوا على بيوتكن النكهات لي بترغبوها عبر توترز إذا كنتوا ببيروت أو بضواحيها.

للمزيد من المعلومات زوروا موقعن على انستاغرام أو تواصلوا معن على 741 657 03.

عنجد هل نهار لي قضينا ب L’atelier des Glaces ما رح ننسا كل حياتنا لأن دقنا في أطيب بوظة بالدني… صراحة وقف الحكي هون ما بق فينا نحكي أكتر صار دوركن إنتو تطلعوا وتعيشوا التجربة بذاتكن.

شوفوا كمان، ٢٠ شغلة وشغلة تعملوها هالصيفية بلبنان.