القعدة جنوبية والمرقوق اللبناني…شوفوا معنا هالكافيه بالضيعة

ما بتحلى الصبحية إلا بأحضان الوادي على صوت الشلال مع أطيب لقمة مرقوق!

كافيه ومطعم أبواب فاتح إبوابه بمنطقة جباع بالجنوب ليستقبلكن على قعدة الضيعة تحت شجر الزيتون، في أحلى من هيك؟

ناطركن بيت ضيعة من الحجر العتيق وأكل على الببور، بتقعدوا على كراسي خشب قديمة تحت الشجر، بتاكلوا أكل بيتوتي بصحون روميو وجوليت، بتبلّوا ريقكن بميّ من البريق، بتصبوا فنجان قهوة من الركوة، بتلعبوا لعبة داما، وبتتونّسوا بنسمات الهوا الرايحة والجاية.

كل الأكل بلدي، الخضرا طازة من الحقلة، العصير طبيعي مية بالمية، وأكيد عندن خلطاتن السرية. الترويقة عندن مميزة من لبنة بلدية مكعزلة، جبنة على أنواعها، بيض مقلي، مربى التين، مكدوس على أصولو، وزيتون جنوبي من ضيعة جباع. وكمان فيكن تجربوا الفتة بيعملوها غير شكل، فتة بلبن، وفتة قورما، وفتة كرز، وفتة باتنجان، وقصص كتير طيبة!

ع الغدا بتجربوا أطيب سفرة مشاوي مشكلّة مع أشهى مازة اللبنانية، وأكيد ما تنسوا تجربوا التوت مع السيفن آب لتبوردوا، أو كباية الليموناضة بيعملوها بخلطة سرية!

وصار فيكن تحضروا مونتكن من “النملية” عند أبواب، بتلاقوا لبنة مكعزلة، زعتر بلدي، سماق، كمونة جنوبية، كشك، زهورات، مكدوس، دبس الرمان، عيزقان مقطر، نعنع مقطر، والمربى على أنواعه… مربى التين المعقود بالجوز، مربى اليقطين، مربى التوت والفريز، وحتى شراب التوت أو شراب الورد!

وكمان عندن بيوت ضيافة على موديل الضيعة بقلب الوادي وبين الشجر، لتقضوا كم نهار بالجنوب غير شكل!

للمزيد من المعلومات، اتصلوا على 070 811 81

شوفوا كمان، صبحية بالجبل أو على صوت البحر؟ شوفوا معنا هل-٧ مطارح المهضومة