أغرب أسئلة ومواقف بتصير وقت نقدم على وظيفة بلبنان

اللّبناني معروف بهضامته وسلاسته بكل شي حتى بأصعب المواقف. منهيك بالنسبة للوظايف بلبنان منلاقي أهضم أصحاب عمل وأسلس مقدمين وظايف. ليش أهضم؟ خلينا نبلش بمتطلبات الوظايف بلبنان:

– مطلوب خبرة ١٥ سنة

على شرط يكون العمر تحت ال٣٥ سنة يعني فعليًا بدو يكون المقدم على وظيفة خالص درسه على ٥ سنين ومبلش شغل.

– شهادة جامعية ماستر أو دكتورة.

طيب عال. بس هالشهادات كلها مش لوظيفة حكيم أو مهندس لكن كرامة وظيفة على الصندوق أو داتا أنتري أو سكريتاريا.

– إتقان العربية والفرنسية والانكليزية

قراءة وكتابة بسبب التواصل مع الجهات الخارجية وشركات الشحن. بيطلع إنو هالجهات الخارجية هي الإمارات ومصر والسعودية يعني إتقان العربي بزيادة!

– بالنسبة للبنات خاصة إنو تكون حسنة المظهر وجسمها حلو

وبينطلب منها تلبس لباس حلو بسبب الوجوه يلي بتشوفها كل يوم. بتطلع الوظيفة عبارة عن قعدة بنص مكتب بين ٤ حيطان وبيمرق زبون كل ٥ إيام مرّة. يعني اللباس الحسن لصاحب العمل أند كو…

بعد ما نحصل على كل هالمتطلبات وننطلب على مقابلة يعني المفروض وصلنا لآخر الطريق. منفوت على المقابلة وبتبلش أسئلة ال أف بي أي.

١- ليش بدك تشتغل عنا بالشركة؟ (والله عجبني شكل المبنى…)

٢- شو أكبر إنجاز عالمي عملته بحياتك؟ (إنّو بعدني قادر عيش بلبنان)

٣- شي مرة أنقذت حدا من الموت؟ (حدا بدو ينقذك مني بعد شوي)

٤- وين بتشوف حالك بعد ١٠ سنين؟ (بالحبس بعد هالمقابلة)

وأخيرًا بعد ما رحت وحرقت نهارك وأعصابك ونجحت بحوارك مع ال أف بي أي بقلك: شكرًا نحنا منرجع منحكيك! ودوري فينا يا دنيا…

شوفوا هالفيديو المهضوم عن مقابلات العمل بلبنان. تمثيل: مريم شومان