٤ مشاهير لبنانيين لح يضوّا ممشى دبي للمشاهير بتشرين الأول ٢٠١٩

تفتتح إمارة دبي ممشى دبي للمشاهير المعروف ب”Walk of Fame” بنسخته العربية بشهر تشرين الأول ٢٠١٩ في وسط المدينة بدبي.

ومن المتوقع إنو ممشى دبي للمشاهير أو يلي أخد تسمية “نجوم دبي” يكون أهم وأحدث من النسخة الأميركية وينافس بأشواط ممشى هوليوود للمشاهير علمًا إنّو لح يتم توزيع ٤٠٠ نجمة لمشاهير تم التصويت إلن من قبل الجمهور من خلال مواقع التواصل الاجتماعي.

بس الحدث الأكبر والأهم هوّي التصريح يلي تسرّب بإنّو لبنان لح يكون إلو مكان بهالحفل من خلال تكريم ٤ عظماء لبنانيين وحصولن على نجوم خاصة فيهن:

١- النجمة اللبنانية نانسي عجرم

يلي برصيدها ٨ ألبومات بالإضافة لشهرتها بإمارة دبي بتسكير شباك التذاكر بكل الحفلات يلي بتقدمهن بالإمارات ومع ترشيحات بسفرها إلى دبي لتولّع الجوء بمناسبة عيد الأضحى.

٢ – المصمم اللبناني العالمي إيلي صعب

يلي بلّش عمله بالعام ١٩٨٠ ولا زالت تصاميمه حديث الساعة بالإضافة لشهرته بالإمارات بعد ما صمم لأهم الأميرات وزوجات رجال الأعمال الإماراتيين ووصول اسمه لأوجّه بالعام ٢٠٠٢ لما بلّش يصمم لمشاهير هوليوود.

٣ – مطربة لبنان والشرق الأوسط فيروز

نسبةً لمسيرتها الفنية يلي بتتخطى ال٨٠ سنة علمًا إنّو السيدة فيروز كانت ولا تزال جوهرة لبنان يلي توّجت مسرحيات الرحباني وغنت على أهم مسارح الأوبرا الأوروبية والعالمية.

٤ – الكاتب والفيلسوف والرسّام الأسطورة الراحل جبران خليل جبران

يلي على الرغم من رحيله إلّا إنّو لا يزال أيقونة لبنان للعالمية بكتاباته ولوحاته خاصة إنّو كتاباته هزت العالم وتُرجمت لكل اللغات على خُطى شكسبير.

منذكر إنّو “نجوم دبي” لح يكون الحفل الأول من نوعه بالشرق الأوسط والنسخة العربية الأولى لممشى هوليوود للمشاهير.