بيت ضيافة بقعدة ملوكية بترجع أصالة الشرق

مشوار اليوم على منطقة كسروان وتحديداً بلدة الكفور، مخبى بهالمنطقة مطرح مميز اسمه انيدرا، بيت ضيافة بياخد العقل بتفاصيله التاريخية العريقة وجماله الشرقي الساحر. كفوا معنا لتعرفوا اكتر.

إذا عم تفتشوا على جلسة ملوكية فاخرة رح تلاقوها بهالبيت، عمره فوق ال٢٠٠ سنة وبقدملكن قعدات شرقية بترجعكن بالزمن سنين لورا، تفاصيله مستوحاة من العمارات العثمانية والشرقية بالنقشات، والزخرفات، والبلاط الفخم، والسجاد التقيل، والديكور القديم المميز. بيحوي على فنيات وأثريات ولوحات من مختلف البلاد العربية والشرقية، وبيجمعلكن تراث غني بالتاريخ بمطرح واحد بيسحركن من أول ما تفوتوا.

وين ما برمتوا بالبيت بتلاقوا شي مميز ومختلف، عنده جو دافي وشامينه مزخرفة متل التحفة ومكتبات فيها كتب كتير، وحتى مكان خاص للمساج ورياضة التأمل.

انديرا بقدملكن ترويقة مع كاسة شاي الصبحيات، وغدا وعشا من إيدن محترفين من لبنان وتايلاند لتنبسطوا بأطباق مميزة وغير شكل، والأروع من هيك انه فيه أوضة سفرة بتصميم ملوكي على الآخر وفخم بكل تفاصيله، بتحسوا حالكن بعالم غير من الحكايات والقصص الشرقية اللي كنا نسمعها.

بتلاقوا بهل البيت كذا سويت وكل واحد أفخم من التاني، أوض النوم بتاخد العقل بتصميمها الشرقي الأصيل لتنبسطوا بليلة من العمر.

أمّا لما تضهروا لبرا بتلاقوا قعدة عربية تحت الشجر العتيق، وعندن جنينة واسعة ومسبح كبير ومساحات كتير حلوة ومليانة ورد وخضار تقعدوا فيهن ساعات وساعات.

بحال حبيتوا المشوار، فيكن تحجزوا على الرقم: ٠٣٢٩٠٠٤٦

شوفوا كمان، بيت ال١٢٠٠ سنة بجبيل جاهز يستقبلكن بالورد والياسمين