شوفوا ٦ كافيهات مع قعدة جنينة ساحرة ببيروت

حابين تتعرفوا على كم مطرح بجيبولكن سحر الطبيعة على قلب بيروت؟ بعجقة المدينة كتير بيخطر عبالنا نشرب فنجان قهوة بمكان رايق، محضون بالشجر وبحسّسنا انو نحن بعالم بعيد عن كل شي. كرمال هيك لقينالكن ٦ كافيهات مع قعدة جنينة وشجر ببيروت. كفوا معنا لتعرفوا اكتر.

١- دار الوردية – الحمرا

كافيه محاوط بالشجر والجو البيتوتي العتيق، فوق إنه جلسته رايقة على الآخر، بيحتوي على قطع فنية على موديل الزمن القديم. مكان مميز لترويقة خفيفة مع كاسة شاي دافية، خاصة بالطقس الخريفي.

الرقم: ٠١٣٧٣٣٤٨

٢- La Appartement – السيوفي – الأشرفية

إستأنسوا انتو وأصحابكن بهل الكافيه و-pub، عنده قعدة مكنكنة تحت الشجر وجنينة واسعة لتشموا هوا حلو. رح تنسوا حالكن إنكن ببيروت!

الرقم: ٠٣٤٣٦٣٧٠

٣- بيت – مار مخايل النهر

روحوا صوب مار مخايل وزوروا كافيه بيت. هيدا الكافيه عنده جنينة خضرا مكنكنة على بعضها، مع كراسي خشب عتيقة وشبابيك مقنطرة. بتلاقوا بكل زاوية قطع من التراث والزمن الجميل. مكان مميز رح يسحركن بالجو اللطيف بين الشجر.

الرقم: ٧٨٩٧٣٧٠٧

٤- مكان – مار مخايل

مطعم مكان بيجمع بين قعدة الجنينة اللي بتخطف القلب والجو الثقافي والكلاسيكي. إنبسطوا بأكل عالمي بين الشجر والورد مع جلسة بتروق الراس.

الرقم: ٧٠٩٥٤٠٥٧

٥- كافيه يونس – الحمرا

اتفضلوا على أطيب فنجان قهوة وأهضم قعدة جنينة عند يونس. كافيه أصيل وبيجذب كل الناس لعنده. إذا تعبانين من الشغل وعبالكن جلسة تتونسوا فيها، هيدا المكان رح يعجبكن. وإذا بتحبوا الفيقة على بكير وبدكن مكان رايق، كمان القعدة غير شكل!

الرقم: ٠١٧٥٠٩٧٥

٦- Orenda – مار مخايل

كافيه وpub مهضوم مخبى بين زوايا مار مخايل. بقدم قعدة جنينة كتير وِنسة على الآخر، ومانيو أكل بشهي ومقدم بكل فن وحب. مكان لطيف لحيوانتكن الأليفة، بيتميز بتفاصيله الفنية وجلسته المغمورة بالشجر العتيق.

الرقم: ٠٣٩٢٧٨٨٦

شوفوا كمان، ٨ كافيهات خريفية مكنكنة لأطيب فنجان شاي