برمانا هل ويك-أند: مهرجان صيفي وموسيقى وأكل طيب (الدخول مجاني)

شو عاملين هل ويك-أند؟ إذا مش عاملين شي، يلا على برمانا لأن المشوار بطول العمر!

إذا عبالكن تهربوا من شوبات بيروت وتقضوا وقت حلو مع عيلتكن أو أصحابكن بمنطقة جبلية ساحرة، مننصحكن تروحوا هالويك-أند على برمانا لأن رح يكون في المهرجان الصيفي.

بلش المهرجان ورح يضل لنهار الأحد بساحة الضيعة ورح يتضمن سهرات غنائية، ألعاب ونشاطات للولاد ومطاعم ومحلات ومعارض فنية وأشغال حرفية بالإضافة لمنتوجات يدوية ومونة بلدية ومحلات إكسسوارات.

كل stand رح يكون مخصص لspécialité شكل ورح يكون في كل شي بيخطر على بالكن وأكيد أكل كتير طيب وحلويات!

لتكمل فرحتكن رح يكون كمان في فرق موسيقية وفنية تزين شوارع برمانا وكيف ما رح تبرموا رح تحسوا بسحر الأضواء وألوان الصيفية وبالطقس الحلو وأكيد فيكن تاكلوا بهل أجواء بمطاعم السوق أو تبوردوا وتشربوا عصير فريش وبوظة.

الولاد كمان رح يكون إلن حصة كبيرة، رح يتسلوا كتير لأن في Kids Zone مخصصة بس للولاد رح ينظموا ألعاب ونشاطات مسلية متل الFlash Games وغيرها.

لهيك، كونوا كتار واستفيدوا من آخر إيام الصيفية!

وإذا ما عبالكن تاكلوا بالمهرجان أو عبالكن قعدة بشي محل على رواق، فيكن تصفوا السيارة تتمشوا بالسوق وتغيروا جو وتاخدوا صور، ترجعوا تقعدوا بشي مطعم على ذوقكن.

ملاحظة: المهرجان ببلش الساعة 5 بعد الضهر وبيستمر للساعة 12 نص ليل، إذا بدكن تسنفسروا أكتر اتصلوا على: 420 004 81

لتعرفوا أكتر عن القصص لي فيكن تعملوها بس تكونوا ببرمانا: شوفوا كيف فيكن تقضوا نهار كامل ببرمانا.