جلسة تحت القناطر وأكل مقدم على طاولة الزهر: شوفوا هل مطعم المهضوم

بتحبوا تكتشفوا محلات جديدة؟ لقينالكن مطعم كتير مميز بقدم الأكلات على طاولة زهر!

جلسة العين محل مميز فتح بضيعة بيت شباب سنة 2016، بيتمتع بأحلى قعدة تحت القناطر وبيتميز بالديكور العتيق، الطاولات الخشب والكراسي العتيقة مع شرشرف أحمر وأبيض بذكركن بجو الضيعة.

هل محل معروف بشي كتير مهضوم وخاص فيه يلي هو عبارة عن طاولة زهر مليانة أكل طيب: حمص، لبنة، لبنة وتوم، تبولة، صحن خضرا، رقاقات، سمبوسك، كبة، سجق، حمص ولحمة، بطاطا حرا وحلوم مشوي. وبس تخلصوا الأكلات بتلعبوا دق طاولة.

شي مرة مجربين صاج برغر؟ سلطة وبطاطا مع خلطة سرية على قطعة لحمة أو دجاج ولا أطيب.

وأكيد ما تنسوا تطلبوا ساندويشات على الصاج لأن بشهوا ورح تاكلوا صابيعكن وراهن.

والأحلى من هيك؟ جلسة العين بيعمل مسابقات وبطولات بلعب الطاولة! وفيكن كمان تقصدوا لتجوا تبوردوا بساحة الضيعة وتلعبوا دق ورق أو طاولة وتشربوا فنجان شاي مع مشطاح.

عندن كمان عرق بلدي بشهي! وبيعملوا أطيب فنجان قهوة على الفحم.

وأكيد أكيد لازم تجربوا الأكلات لي بتوصل على طاولتكن بالفخارة متل البيض بقورما والسجق والمقانق… فعلاً هل محل بيعمل أطيب أنواع الأكل والساندوشات والصاج.

شو ناطرين؟ يلا نجرب!

الرقم: 790 157 79

إذا عبالكن تقضوا ليلة غير شكل ببيت شباب شوفوا هل بيت الحجر والقرميد أحمر والقعدة لي بطير العقل لناطرتكن بهيدا البيت الساحر.