لقينا ١٧ مطعم بصور مع منظر بطير العقل

ما فينا نحكي عن جمال لبنان من دون ما نذكر سحر صور ملكة البحر وعاصمة من عواصم فينيقيا العتيقة. زيارة صور ما بتصير من دون ما نشوف خيارات المطاعم المتنوعة اللبنانية والعالمية الموجودة لي بحضروا أشهى المأكولات والأطباق من المطبخ المحلي والعالمي ولي رح تاخدكن على رحلة ممتعة واستثنائية.

وهيك بعد ما خبرناكن عن ٢٠ مطعم بالبترون مع منظر بطير العقل، اليوم رح نخبركن عن مطاعم صور.

يلا على صور!

١. لو فينيسيان

رح نبلش جولتنا بهل مطعم الساحر، رح توصلوا تتفرجوا على عظمة شط صور وتسترجعوا مجد الحضارات القديمة، متل ما إسمو بدل علي: الفينيقي رح ياخدكن بإيدكن ويرجعكن على إيام زمان وقت كان الصياد الفينيقي يجول العالم حامل صنارة بإيدو ولبنان بقلبو. رح تاكلوا أطيب سمك وثمار البحر مع منظر بياخد العقل والقلب على البحر.

الرقم: 564 740 07

٢. ريدوود

بتوصلوا على هل محل، رح تحسوا حالكن برحلة على اليابان وتشموا عطر الأكل وريحة البحر وتمتعوا نظركن بجمال صور. قعدة هل محل حجر عتيق وكراسي حمر وصواني سوشي من كل الطعمات والنكهات. بتلاقوا كمان سلطات، مقبلات وصحون رز على لحمة و سمك.

الرقم: 125 177 76

٣. تافولينو

إنتو وعم تتمشوا بشوارع صور القديمة رح تلاقوا هل محل الزغير لي عندو ديكور استثنائي وقعدة برا بترد الروح، مناسبة لدردشة مع الأصحاب أو لقاء رومانسي مع الحبيب. إذا عبالكن جو مختلف بالأكل مع شوية موسيقى ورقص وبيتزا وباستا، المطبخ الإيطالي عند تافولينو ولا أطيب من هيك!

الرقم: 135 740 07

٤. كلاود 59 Cloud

إذا بتحبوا قعدة البحر والرمل تحت إجريكن، وتاكلوا سمك إنتو وعم تسمعوا صوت الموج، هل محل رح يحققلكن حلمكن. بتخلصوا أكل بتشربوا شي مسقع وبتنزلوا بستبحوا وبتبوردوا: في أحلى من هيك شعور؟

الرقم: 996 517 03

٥. ذا بلو لاين

بتحبوا العجقة، الموسيقى والأجواء الفرحة؟ هل محل بيعمل كل شي أكل بحر وسمك فريش ومقبلات على أنواعها مع موسيقى وفرح وجو حلو. عندو قعدة جوا وبرا وفريق العمل كتير حبوب. هل محل مناسب لجميع مناسباتكن أو لتكفوا الليلية بعد نهار طويل على البحر.

الرقم: 675 134 03

٦. يام سيفود Yam Seafood

إذا صور على بالكن، هل محل رح تلاقوا قبالكن. مطعم شواطينا من كلاسيكيات المنطقة معروف باللقمة الطيبة وأكلات السمك الغير شكل متل السمك المقلي والمشوي، الباني، القريدس، الصيادية، سمك مشكل، سومو وفيلي وميزا لبنانية ولا أطيب. هل مطعم بطل على بحر صور وبياخدكن مشوار على عالم مليان سمك ومي وحب.

الرقم: 646 104 71

٧. دار ألما

مطعم دار ألما معلق على كتف البحر وآخد جمالو وألوانو من بحر صور. هل محل متل الحلم رح يحسسكن إنكن قاعدين بجزيرة أمالفي الإيطالية من ورا المنظر الساحر على البحر والقلعة بالمي والألوان والرومانسية والأكل الطيب. أحلى هدية ممكن تعملوها لحدا بتحبوا إنكن تجيبوا على هيك محل، تخلوا يغمض عيونوا ويفتحهن على منظر الموج عم يغمر الصخر والأكل الطيب على الطاولة وهيك بتاخدوا أجمل الصور.

الرقم: 082 740 07

٨. حرتقجي

قعدة الحرتقجي لبنانية مية بالمية، هل محل رح ياخدكن برحلة استكشاف أطيب الطبخات اللبنانية التقليدية والمأكولات البحرية المقدمة بحب واهتمام. القعدة على التراس بتاخد العقل وفي كمان مراطبين مونة بلدية وأكيد أكلات رح تجربوها لأول مرة بحياتكن. مين قال الطبخ الجنوبي ما إلو أربابو؟ هل محل بيعمل كل الطبخات الجنوبية بحنية وعلى الأصول متل كمونة البندورة، المجدرة الجنوبية والفراكي.

الرقم: 701 008 03

٩. تشوبس دينير Chops Diner

لأنو البحر هوي الشي لي ما بينشبع منو بصور، هل محل رح يطعميكن أطيب لقمة على البحر. رح تاكلوا كل شي بتتمنوا إنتو وقاعدين بالبرودات عم تسمعوا صوت الموج وتتفرجوا على منظر الشمس عم تغيب ورا البحر. هل محل معروف بالمشاوي والكوكتيل والعصير الطيب، أكيد لازم تتركوا محل كمان للبوظة لأن ولا أطيب من هيك.

الرقم: 613 345 07

١٠. بامبو

بامبو بيستقبلكن بقلب مضياف وعلى قعدة بتنسيكن هموم الدني. رح توصلوا وتنغرموا بهوايات صور وبهل مطعم بالتحديد لي متخصص بالمطبخ الياباني والفيتنامي. الديكور رح يسحركن، الطاولات خشب، الزهور معباية المحل، المصابيح وأواني الفخار بيضفوا على المحل طراز غجري لبناني مع لمسة عصرية.

الرقم: 236 477 71

١١. مرجوحة

تراس المرجوحة رح ياخدكن على جزر اليونان ويترككن تحلموا وتسرحوا لبعيد بأفكاركن. أول ما توصلوا على المطعم رح يبلش قلبكن يدق وتحسوا بسحر صور وأكيد رح تتمتعوا بكل المأكولات الشرقية الشهية مع منظر خرافي.

الرقم: 208 797 76

١٢. الفنار

هل محل رح ياخدكن رحلة على الماضي الجميل من خلال حيطان الحجر لي بتحكي ألف قصة وقصة. منتجع الفنار عبارة عن بيت أسطوري تحول لمطعم ومنتجع سياحي بيغمر البحر وبطل على أجمل المناظر الطبيعية بصور، بتحسوا حارس المنطقة وسكانها وسواحها. بقدم هل مطعم أطباق لبنانية شهية محضرة بعناية ومن مقادير فريش وبقدم كمان مشروبات على أنواعها.

الرقم: 111 741 07

١٣. إيلا

على مينا صور قاعد مطعم إيلا الساحر، لي بيتميز بديكور غربي وغجري مع لمسة لبنانية. هل محل متخصص بتقديم أطيب المأكولات الغربية والسريعة والمشروبات الباردة والكوكتيلات على فواكي مع موسيقى والبحر قبالكن.

الرقم: 879 894 03

١٤. دون فيتو

عبالكن تروحوا على إيطاليا؟ شوفوا هل محل لي رح يجبلكن كل نكهات إيطاليا على طاولتكن مع خلطة سرية وشوية حب ورومانسية. القعدة بهل محل رومانسية ومريحة والديكور دافي بدفي قلبكن وبخليكن تسرحوا لبعيد. جربوا الأكلات التليانية الشهية متل اللازانيا، البيتزا والباستا الكاربونارا، الريزوتو والسلطات الشهية والقهوة على أنواعها.

الرقم: 297 351 07

١٥. المرسة

هل مطعم بيبعد دقايق عن شط صور، بقدم سفرة لبنانية غير شكل ومأكولات بحرية على أنواعها واصلة من البحر على طاولتكن لمكنحكن شعور بالحب والسعادة الحقيقية.

الرقم: 356 346 07

١٦. روستيكا كافي

مين مش مولع بالقهوة؟ هل محل ببساطة رح يعملكن ترويقتكن المفضلة مع كاسة شاي وأغاني فيروز ومنظر على البحر. يمكن ما رح تعرفوا قيمة صور قبل ما تجربوا هل قعدة لي رح تخليكن تتعلقوا بعروسة البحر وتتمنوا ترجعوا تزوروها مرة تانية وتالتة.

الرقم: 183 827 03

١٧. أوغاريت

مين ما بيعرف أسطورة البحر أوغاريت؟ هل محل رح ياخدكن رحلة على شط فينيقيا القديم ليعرفكن على تاريخنا ومجدنا وحضارتنا الممزوجة بالأكل الطيب. أوغاريت رح يشعركن بأجواء الضيعة القديمة مطرح ما اللمة الحلوة واللقمة الطيبة بيجتمعوا على رنة العود ليعزفوا أحلى الأوتار خاصةً على الصبحية.

الرقم: 086 076 81