٧ نشاطات مميزة فيكن تجربوا بإهدن هل ويك أند

معكن بنزين؟ اتجهوا إلى منطقة اهدن! كلنا عبالنا نغير جو هالويك أند لأنو عنجد زهقنا من القعدة بالبيت. شوفوا معنا هل 7 نشاطات المميزة لي فيكن تجربوها هالويك أند بإهدن لتفشوا خلقكن!

1- “بار فو” ريستو بار

رقصوا كل الليل “ببار فو” لي بيتميز بقعدتو الحلوة والراقية وبأكلو الطيب والموسيقى لي ما بتهدى والجو الولعان لآخر الليل. ولي بحب البرود، عندن قعدة برا كمان ومنظر ولا أروع وخاصة وقت الغروب.

2- مطعم تاج

إذا حابب تضهر إنت والشريك هل ويك أند وتقضوا ليلة ولا أروع بعيدة عن ضجة المدينة وتعيشوا جو رومنسي، ما إلكن غير مطعم تاج لي بيتميز بقعدتو الحلوة وأكلو اللبناني الشهي والمنوع.

3- محمية حرش إهدن

محمية حرش إهدن من أجمل المحلات لي ممكن تكتشفوها هل صيفية بلبنان. بتتميز بأجمل الجواهر الطبيعية الجبلية (أشجار الأرز، الصنوبر والشوفان وغيرن، وورود على مد النظر، عصافير وينابيع مي). ونصيحة جيبوا معكن قناني مي فاضية وعبوا من مي النبع، ولا ألذ! وأكيد ما تنسوا تجيبوا الكاميرا لتاخدوا أحلى الصور!

4- كنيسة سيدة الحصن

كنيسة سيدة الحصن من أجمل كنايس الشمال، هون السما قريبة! هل كنيسة بطل على كل الشمال وجبالوا من القبيات لوادي قنويين. ولتحرز الزيارة، تعوا بوقت الغروب واستمتعوا بأحلى منظر وروقوا راسكن.

5- تمثال يوسف بيك كرم

تمثال يوسف بيك كرم فخر لكل أهالي إهدن وزغرتا لأن بذكرهن بأمجاد هل منطقة بالماضي. يوسف بيك كرم أشهر من أن يعرف، يعتبر من أهم الشخصيات التاريخية اللبنانية لي كانت معروفي بنضالها المستمر بمجال حقوق الإنسان وبتصديها للدولة العثمانية.

6- “مينوس”

“مينوس باب” من أجمل المحلات لي ممكن تزوروها بإهدن. الأكل الطيب ما بيكمل بلا قعدة بتجنن! كرمال هيك رح تستمتعوا بهل محل لي قعدتو بتشيل الهم عن القلب وبيتميز بأجمل جو وأحلى موسيقى تحت سما إهدن الساحرة. و أكيد المشروبات لي بقدموها ولا أطيب وكلها معمولة من الفواكي وخاصة الأناناس الفريش. تعوا دوقوا واستلذوا!

7- “إهدن ماونتن أكتيفيتيذ” غروب“

“إهدن ماونتن أكتيفيتيذ” غروب بنظملكن نشاطات رياضية وتخييم ورحلات بقلب إهدن وبيتألف من فريق متخصص ومتمرس برافقكم وبساعدكن طول الوقت. فإذا عبالكن تتسلوا أو تقضوا وقت بأحضان طبيعة، ما إلكن غير تتواصلوا معن وتحضروا الشنطة!