تعرفوا على دوما: من أجمل القرى بلبنان

قد ما حكينا عن جمال لبنان ما منخلص كل مرة لازم نكتشف فيه مناطق وقرى جديدة وهالمرة بدنا نحكي عن قرية دوما الموجودة بقضاء البترون بالشمال، هالقرية المعروفة بجمالها الطبيعي وبحجرها القديم وقرميدها الأحمر، فيها تاريخ كبير بيحكي عن طيبة أهلها، وهالقرية تعتبر مقصد للسياح ومكان مناسب للهروب من ضجيج المدينة، تعو نتعرف عالإشيا يلي فينا نعملها بدوما.

١. بيت دوما:

يلي حابب يقضي ليلة بدوما في ينام بهالبيت الضيافة يلي بيتميز بتصميموا من جوا ومن برا، هالبيت بقدم أطيب مناقيش مخبوزة بفرن الحجر القديم والبيض بالفخارة واللبنة البلدية، كل شي بهالبيت بيحكي عن أصالة القرى اللبنانية وتراثها.

٢. هايكنغ:

يلي بدو يعمل هايكنغ و يكتشف طرقات دوما وطبيعتها الحلوة في كتير طرقات فينا نمشي فيها بدوما، متل طريق سكة الشام يلي بتوصلكن من دوما على بالوع بلعة.

٣. سوق دوما القديم:

هالسوق بيتألف من ١٢٥ محل تجاري ومن ضمنن بيت المونة الدومانية يلي ببيع كل أنواع المونة بدوما من زعتر وكبيس وزيت زيتون وصابون وأهم شي الراحة يلي بتتميز بصناعتها، بالإضافة لوجود متاحف بتحكي عن تاريخ دوما وتراثها.

٤. سينما دوما:

هالسينما الأثرية يلي افتتحت سنة ١٩٥١ وكانت ملتقى الشباب بدوما وشهدت على عروض أفلام كتيرة متل فيلم سفر برلك و فيلم عنتر وعبلة.

٥. بوظة الزحلاوي:

أشهر من أن يعرف بدوما هالمحل يلي ببيع أطيب بوظة بدوما ما فيك تزورها وما تاكل عندوا.

٦. دير مار نهرا:

بهالدير موجود شجرة سنديان عمرها من عمر الدير تقريباً ١٥٠٠ سنة هالشجرة كتير عملاقة بتغطي مساحة كبيرة من الدير.