٢٠ شغلة بتلاقيها بكل بيت لبناني

في كتير قصص عفوية وصغيرة موجودة بالبيت اللبناني، في إشيا تعودنا على وجودها وقصص منعملها بلا ما نسأل، تعو نعرفكن على بعض غرايب وعجايب البيت اللبناني.

١. أهم شي علبة البيتيفور يلي بتفتحا لتاكل وبتطلع علبة خياطة.

٢. في علبة صغيرة بالمطبخ بتلاقي فيها زرار وبطاريات فاضية.

٣. تجميع الكياس العادية بالمطبخ أما كياس الماركات بتلاقوهن تحت فرشة التخت.

٤. دايماً ورا حنفية المطبخ في صواني.

٥. في نص حامضة بالبراد صارت على آخر روح.

٦. مشايات البيت كل فردة بغرفة.

٧. عندهم هالولد الذكي ويلي بيطلع منوا بس لو بيدرس.

٨. نباريش الاراغيل معلقين ورا باب المطبخ.

٩. عطول ضو المطبخ شغال.

١٠. دايماً الريموت ضايع.

١١. منافض وزنها شي ٢٠ كيلو.

١٢. لما بفكروا يعملوا شي مشوار مع بعض دايماً بيطلعلن النكد يلي ما بدوا يضهر.

١٣. لما بدق باب البيت الكل بيهرب على غرفته وبقفلوا البواب.

١٤. أهم شي وجود مفتاح البيت تحت دعاسة الباب.

١٥. دايماً أصغر ولد بكون ديليفري البيت.

١٦. في شقف كروشيه من أيام ستك.

١٧. كل البلوز القديمة بتصير شقفة لتمسيح الغبرة.

١٨. ما فيك تترك شي بالبراد (شوكولا، تشيبس، عصير) وترجع تلاقي.

١٩. بمجرد ما يعرفوا بمشكل بالشارع بصيروا يدفشوا ببعض ويركضوا ليوصلوا على أقرب شرفة أو شباك.

٢٠. بمجرد ما شخص يوقف بتنزل عليه الطلبات (جبلي معك ماء، خدلي الصحن عالمطبخ…)