الأكلات الشتوية يلي بتشتهر فيها الضيع اللبنانية

طبعاً لكل فصل الو نكهته الخاصة بلبنان وكيف لما يطل علينا فصل الشتاء محمل بالبرد والعواصف، فصل الجمعات العائلية حد الصوبيا وبهيك أجواء بطل علينا المأكولات الشتوية بامتياز، واللبنانية معروفين بنفسن الطيب والإبداع بإختراع أطيب المأكولات، وكل قرية بلبنان بتقدم أطباق شتوية ولا أطيب بتميزها عن باقي القرى اللبنانية ونحن اخترنالكن أطيب الأكلات الشتوية المعروفة بالقرى والمناطق اللبنانية.

هلئ رح نعمل جولة ببعض القرى اللبنانية من أقصى الشمال لأقصى الجنوب مروراً بالجبل وسهل البقاع تنخبركن عن أطيب المأكولات الشتوية.

أبرز القرى اللبنانية بتركز على وجود البرغل يلي بيعتبروا حديد الركب وبيستعلوا بكل أنواع الشوربة وأهم شي “مخلوطة الحبوب”.

أما الكشك اللبناني البلدي يلي ما بفارق الموائد القروية أبداً ما في أطيب منو بالشتي وإذا ما نوجد عالغدا أكيد بينوجد عالترويقة والعشا ويلي مش دايق هالاطباق القروية المطبوخة بالكشك أكيد مننصحكن تجربوها.

كبة بالكشك

قاورما بالكشك والبطاطا

كشك بالبيض

معكرون بالكشك

ودايما أهل القرى بفضلوا المأكولات الدهنية لأن بتعطي حرارة للجسم بالشتوية أهم شي القاورما على أنواعها ان كانت بالفطاير أو بالكبّة الزغرتاوية يلي بتنشوى بفرن الصوبيا.

وكيف ما بدنا نذكر بعلبك مدينة الشمس بأشهر صفيحة بعلبكية ومش عمنحكي عن أي صفيحة عمنحكي عن فتة الصفيحة باللبن وأكلة أبو منمش.

وما بتكمل الشتوية الا مع الهريسة المطبوخة عالحطب.

هلئ بعيداٌ عن القرى ما بدنا ننسى بيروت ست الدنيا بالأكلات الشتوية البيروتية يلي العدس فيها بكون حاضر على المائدة بأكتر من أكلة ومن ضمنن:

رشتة العدس

حراق إصبعه

عدس بحامض

شوربة العدس

و كبة أرنبية مع الأبو صفير أطيب طبق ببيروت بالشتي

والتحلاية ما بتكمل غير مع السحلب المشهور بكل المناطق اللبنانية وبيتقدم مع الكعك والقرفة.

وهيك منقلكن صحتين وكل شتوية وانتوا بألف خير.