أروع ٧ مناطق لازم تزورن بلبنان

الخبرية من إنو لبنان بلد حلو مش شي جديد، بس هيدول كم مطرح لتضلكن مذكّرين!

١. شلالات بعقلين

بمطرح مخبّى بمنطقة الشوف، في شلالات معروفة من سكان المنطقة هونيك من زمان، بس مش من زمان اكتشفوها السوّاح. فيك تغطس بالماي الزرقا وحوليك مناظر طبيعية بتاخد العقل. لازم تدفع ١٠،٠٠٠ ل.ل. عالشخص إذا بدك تفوت عالشلالات، بس هالمصاري بتروح لحماية هالمنطقة. انتبه ما تلغبط وتروح عمطرح تاني لأن بسمو غير أسماء كمان.
٢. صوفر

هيدا المطرح موجود بالجبال. فيها قصور تاريخية، واوتيلات وبنايات مهجورة فيك تكتشفا لتعرف عن لبنان القديم. تمشّى عكورنيش صوفر ورح تشوف الجمال الطبيعي. ما منستغرب إنو هالمطرح في ناس بتسمّيه شارع العشاق!
٣. أنفه

رحلة عشمال لبنان عساحل مدينة أنفه لرح تحب فيها الماي الزرقا النظيفة والمناظر الحلوة من هيدي المدينة الصغيرة. فيك تزور كنايس قديمة أو البقايا من القلعة القديمة (لكانت أحلى قلعة بالمنطقة)، أو الغرف القديمة المسكونة. بسمّوها “يونان لبنان”. رح تحس حالك برات لبنان، بس ببلدك.
٤. اللقلوق

بالشتا، بتصير اللقلوق واحدة من المطارح لبيجي عليها محبي التزلّج. وبالصيف، كمان المنطقة كتير حلوة. فيك تمشي بالجبال مع مجموعات أو مع رفقاتك، وتسبح، وتعمل مشاوي، وتخيّم تحت ضو القمر بس تكون بدّك تهرب من عجقة المدينة.
٥. شوّان

الصور بتحكي لحالا. كل المنطقة هونيك حلوة وساحرة. إذا عبالك تمشي حد الشجر وتوصل للبحيرة لبضلا مجلدة ونظيفة. ريحة شجر الصنوبر رح بتذكرك لي بتحب هالبلد.
٦. تنورين

دوّر السيارة واطلع عمنطقة تنورين، مطرح ما رح تشوف احتياطي شجر أرز وبالوع بلعا المشهور. بعمق ٢٥٠ م، صارت هالبالوعا من أشهر المناطق لبيجو عليها السوّاح. فيك تعمل هايكينغ، أو تعمل بيك نيك، أو تخيّم- بكل الحالات، رح تنبهر بجمال تنورين.

٧. البترون

بس تبلّش تصيّف الدني، اغطس بأشهر بحر بالبترون واكتشف الكهوف بين الصخور والبحيرات المخفية. تعا لحالك وجيب معك تياب السباحة، وحضّر حالك لتقضّي يوم ما رح تنسي عالبحر.

ترجمة: سمر شرارة