١٢ قاعدة دهبية للسواقة بلبنان

نحنا هون بس عم نعرفكن عالأساسيات يلي بتخولكن تسوقوا متل ما لازم بلبنان. فيك تستمد طرق تعصيبك عالطرقات من هون، أو تستوحي من أي محل تاني، إنتا حر طبعا وهيدا شي بيتحكم في مزاجك الشخصي.

١. فيك تصف وين ما بدك. مش مهم طول ما الفلاشير مضوا.

عالرصيف؟ خط تاني؟ تالت؟ خط كزليار؟ بنص الطريق؟ بنص الطريق وبعز العتمة كمان؟ ما تعتل هم بدقولك. أصلاً العالم كلو تحت أمرك وما عند وشي تاني غيرك.

٢. خلي إيدك عالزمور كل الوقت.

إنتا حبيب قلبك الزمور وبتموت إذا بتشيل إيدك عنو. ممنونيك نحنا يا حب عإستعمال هالوسيلة بالشكل الغلط، وضلك عذب فينا لإنو إنتهاك أعصابنا من حقك.

٣. النزلات بالجور مش مفروض تكون هدفك بالحياة. بليز فتش عشي تاني تعملو.

شو بعد ما حفظتن! المفروض إنوالجور يلي عطريق بيتك يكون صاروا جزء من ردات فعلك الطبيعية. ولو!

٤. طاحش الكل.

وينو ليتحدا وينو؟ وينو لناوي يقاتل؟

٥. الاشارات مش إلزامية أبداً.

لشو لتوجع راسك بالإشارات طالما بيكفي تمد إيدك من الشباك لتعبر عن أساريرك. كمان، الشوفير يلي وراك أكيد عندو قدرة هائلة عالتنبؤ، ورح يعرف شو قررت فجأةً وهوي المسؤول الأول عن حياتك.

٦. الأوتوستراد ملعبنا.

أصلاً أصلاً الهدف من هول الخطوط هوي الزينة وما إلا أي دور فعلي تاني. ضل محافظ عالتقليد العريق تبع إنو تسوق بنصن ومش بيناتن. هيك بتحصل عمساحتك الشخصية، سداح مداح، وما بضيقك خلقك.

٧. توقع عطول تشوف أي شي بوجك، لأن ممكن كل شي يطلع بوجك.

مطبات وغيرو… فتح المزاد.

٨. رح يترصدوا طريقك أربع عشائر بدا التار: الكميونات، الباصات، الفانات والموتويات.

أحد الناجين من الموت صرح وقال: مجرد ما تصادف وحدي من التلت عشائر الأول، حيد وتركلا الطريق سالكة… هيدا بس إذا حابب تحافظ عحياتك. أما بالنسبة للعشيرة الأخيرة، فما تستقل فيا أبداً: الموتويات، وبالرغم من صغر حجما، فيا بعد تكون أشرس بمية مرة من الكميونات.

٩. محلان ضروري كتير تثبت حالك فين: التقاطع والدويرة.

هون بالفعل بتقدر تثبت المهارات يلي عندك ويلي كونتا خلال كل سنين عمرك. صار الوقت إنك تختبر كل شي تعلمتو بنفسك ا وورتو عن أجدادك. خلي الوحش يلي فيك يضهر ويبين.

١٠. للإشارة الحمرا ما بتعني شي.

تحذير: خليك مصحح. وبس يجي دورك لتمرق، تطلع عالجهتين تحسباً لأي خطر مميت. كتار ما بيقشعوا الضو الأحمر لأن وفين يقطعوا عنو بكل راحة ضمير.

١١. الفرصة متاحة عطول لتتعرف عالناس يلي بالسيارة حدك وتصاحبن.

ليك كيف منشف وجو فينا. العمى شو بلا ذوق.

١٢. لبوس وج “المعصب” كل الوقت.

تحلى بنظرة الغضب العارم مجرد ما تقعد عالعرش (كرسي الشوفير). نظرة الغضب من العدة الضرورية يلي بتخليك تكسب مصداقية الناس.

ترجمة: رنا قاروط