ملكات جمال لبنان: وين صاروا اليوم؟

تعوا نرجع شوي لورا، لسنة الـ ٢٠٠٠ بالتحديد، ونشوف شو حققوا صاحبات اللقب السابقين، وكيف في هالوجوه الحلوة عقول مبدعة وخلّاقة. ملاحظة: سنة ٢٠٠٦ تم إلغاء المسابقة بسبب حرب تموز والظروف الأمنية الغير مناسبة. سندرا رزق – ٢٠٠٠ سندرا يلي ابتعدت عن الأضواء، واكبت بحماس كبير موجة الإنستغرام عبر إطلاق آخر صيحات الموضة المفضلة عند النساء الأنيقات… هول يلي بفتشوا عطول كيف يكونوا غير شكل. قدرت ساندرا تبتكر بإسما ماركة جزادين مصنوعة من مواد عالية الجودة وبحرفية بتضاهي أشهر بيوت الأزياء. كرستينا صوايا – ٢٠٠١ كريستينا يلي بتتمتع بجماهيرية كبيرة هي الأشهر بين الكل، وناشطة جداً عبر وسائل التواصل الاجتماعي. ما كتفت بتجربتا بعالم الجمال، راحت أبعد من هيك واستفادت من كل شي تعلمتو لتخوض عالم الأعمال والشركات. اشتغلت كتير بالتلفزيون، مثلت وغنت كمان. كريستيتا امراة فعّالة وناجحة بمجال العلاقة العامة من أكتر من ١٢ سنة. بيانتي قعدة – ٢٠٠٢ خلقت بيانتي بأميركا. وصيفة الـ ٢٠٠١، تم اختيارا افتراضيا ملكة الـ ٢٠٠٢ لأن بوقتا…متل العادة… ما كانت رايقة بالبلد. مثلت لبنان بمسابقة ملكة جمال الكون. تزوجت بعد كم سنة من انكليزي وسافرت معو عبيرطانيا. هونيك بلشت تكتب عن المطبخ اللبناني، وصارت بسرعة من أشهر المدونين بالعالم حول الموضوع. من مدوناتا: “مطبخ الجواهر”، “أسرار المطبخ القذر”، “النكهة اللبنانية” وغيرن… تهافتت الصحف لنشر مواضيعا، ومن بين كتار: سي أن أن ترافل، تيليغراف وطبعاً نحنا، بيروت.كوم. ماري جوزيه حنين – ٢٠٠٣ ماري جوزيه أول ملكة انتخبا الشعب مباشرة، بصوتو هوي، من بعد متابعة برنامج لتلفزيون الواقع استمر شهرين كاملين. عاشت فترة بسيطة بأميركا، انتقلت بعدا للندن وحصلت على شهادة الماجيستير بتاريخ الفن والتصميم. هي اليوم، متل كتير صبابا وشباب، فري لانسر بمجال اختصاصا. أسست سنة الـ ٢٠٠٢ جمعية “ليف تو شير” يلي بتُعنى بتقديم الحاجات الأساسية للمحتاجين. ندين نسيب نجيم – ٢٠٠٤ لما نحكي عن ندين منكون عم نحكي عن مزيج الجمال اللبناني والتونسي المتآلف بشكل ملفت وغريب. ندين صارت من ألمع نجوم المسلسلات اللبنانية خلال الفترة الأخيرة، لعبت أدوار البطولة بمسلسلات أخدت صدى مهم بالعالم العربي متل: الهيبة، نص يوم، القانون، سمارا وتشيللو. غابرييل بو راشد – ٢٠٠٥ حصلت غابرييل على شهادة الماجيستير بالترجمة الفورية بالـ ٢٠٠٩. تزوجت وسافرت تعيش مع شريكا بالإمارات واشتغلت لتأسس مشروعا الخاص. خلق ابنا الأول روبن بالـ٢٠١١، وبعد سنة بس أنجبت بنتا التانية، أليكسيا. حياة العمل والأمومة ما بعدوها عن شغفا الجامح بقيادة الدراجات النارية. هي يلي عندا الجرأة الكافية لتسوق موتويات الهارلي دايفيدسن كانت أول إمراه بالشرق الأوسط بتحصل علقب “ملكة الطرقات”. ندين ويلسون نجيم – ٢٠٠٧ من الصدف النادرة توالي ملكتين بنفس الاسم و بفترة هلأد قصيرة!… “ندين التانية” (إذا فينا نقول) والمعروفة بروح النكتة وحس الدعابة كان إلا بعض البرامج التلفزيونية الخفيفة من بعد فوزا باللقب ومثلت شوي. ارتبطت بحب حياتا سنة ٢٠١٦. تخصصت بالأعمال الدولية، وهي، مع غيرا، مالكة ومديرة لوكالة ميكرو بايتس للتسويق عبر النت، تصميم المواقع الإلكترونية وتطبيقات الهواتف. روزاريتا الطويل – ٢٠٠٨ روزاريتا كمان خريجة أعمال. من بعد تتويجا ملكة ، تابعت شغلا كعارضة بتتمتع بسحر خاص وموهبة خلقانة معا ساعدتا تطلع بشكل عفوي وبعيد عن التكلف. ظهرت على أهم أغلفة مجلات الموضة بالعالم. شاركت بالموسم الأول من الرقص مع النجوم، عالأم تي في، وعندا برنامجا التلفزيوني الخاص وهي ، وبكل فخر، سفيرة تجمع لبنان للشباب. مارتين أندراوس – ٢٠٠٩ اشتهرت بمظهرا الطبيعي وروحا الحرة والبريئة متل الأطفال. نالت شهادة الماجيستير من الجامعة اللبنانية الأميركية بالعلوم السياسية ومرشحة للدكتوراه بالعلاقات الدولية. بعكس غيرا من الملكات، حبت تبعد عن الأضواء وتركز عالشق الأكاديمي بحياتا. رهف عبد الله – ٢٠١٠ من البداية، وبس بعد فترة قصيرة من حصولا على اللقب، قدمت رهف نفسا للجمهور كإعلامية بارزة ومتمكنة بالراديو والتلفزيون. عشقت العمل الاجتماعي وشكلت جزء حيوي فيه. هي منسقة العلاقات العامة باليازا، والسفيرة الفخرية لقوات الأمم المتحدة الموقتة بلبنان. يارا خوري مخايل – ٢٠١١ صاحبة شخصية قوية وحضور لافت. تخصصت بالراديو والإذاعة والأفلام بالجامعة اللبنانية الأميركية وبرعت بتنظيم الحفلات الكبيرة والمناسبات الخاصة. بتدير الإنتاج الإعلامي لشركة “كاركتير” وبتنظم إيفنتس المجموعة بذوق كبير وحرفية عالية ورؤية إبداعية جديدة. رينا شيباني – ٢٠١٢ احتلت رينا مانشاتت الجرايد لما تنافست مع إختا التوأم، رومي، على اللقب. بعد حصولا على شهادة أولى بالتصميم والفن التطبيقي، واصلت صاحبة الشعر الأسود الطويل رحلتا الجامعية ونالت الماجيستير بالهندسة المعمارية. بتقدم رينا ورشات عمل بمجالا يلي بتبرع في، وهي ورومي بنفذوا نماذج لمصممين محليين وعالميين كبار. كارين غراوي – ٢٠١٣ إجت كارين، خليفة رينا، من نفس الخلفية الأكاديمية. تابعت دروسا بالهندسة الداخلية خلال السنة نفسا يلي نالت فيا اللقب. هي اليوم بتمتع بمنصب مديرة الجودة بشركة “لار- كي- تكت”. سالي جريج – ٢٠١٤ المهندسة المدنية سالي الرائعة الجمال توجت حبا الكبير بالزواج بعد سنة من تربعا على العرش. سالي بتنقل للناس ومضات برّاقة عن لقاءاتا بالمشاهير من خلال الإنستاغرام. فاليري أبو شقرا – ٢٠١٥ فاليري بتتمتع بكتير مقومات خلتا توصل للتصفيات الأخيرة بمسابقة ملكة جمال العالم بدون ما يحالفا الحظ، للأسف، وتفوز باللقب الكبير. خطفت عيون وقلوب المشاهدين لما رقصت برشاقة وبراعة خلال الموسم الرابع من “الرقص مع النجوم”. إلى جانب إسهاماتا الإنسانية العديدة، فاليري رح تكون عالأم بي سي ببرنامج “بروجكت ران أواي ميدل إيست” بدورتو الجديدة وتستضيف مبدعين شباب بالسينما والتلفزيون. ترجمة: رنا قاروط