مطعم جديد فتح بقلب The Village ضبيه… والأجواء بتاخد العقل!

ضبيه والنقاش عم يتحولوا لمطرح مليان مطاعم جديدة عم بتقدم تجارب بتشهي، وآخر إضافة على اللائحة هيي ميريس، مطعم بيجمع النكهة المتوسطية مع لمسة حديثة. إذا كنتوا عم بتفتشوا عن تجربة جديدة بالأكل اللبناني، وقعدة مهضومة، هيدا المطعم لازم تروحوا على بقلب The Village!

الأطباق هون لبنانية، بس بلمسة خاصة بالمطعم. كل أنواع المازة موجودة، من التبولة، للبطاطا الحرة، للورق عنب، للكبة كباب، بس في الشيف هون بيضيف لمسة خاصة بتخلي الطعم مألوف مع  إضافة مبتكرة زغيرة بتغير كل شي! الأكلات التراثية كمان موجودة، من المشاوي، للمعجنات والطبخات، للأطباق يلي بتنحط بالنص وبتجمع العيلة.

وكمان عندن أطباق مختلفة جايي من بلدان البحر المتوسط!

بس السر الحقيقي؟ الخبز يلي بيطلع سخن دغري من الفرن على طاولتكن! ميريس عندن فرن خاص بيخبزوا منو البيتزا والخبز الطازة قدام عيونكن، وبتحسوا بالطراوة والريحة قبل حتى ما توصل لقمتكن للتم! قعدة المطعم مهضومة كتير، فيكن تختاروا تقعدوا جوا أو برا والديكور مريح وبيكمل تجربة الأكل.

البرانش هون قصة تانية! الأكلات معمولة بأسلوب يخلي الصبحية مليانة طعمة ودفا، من المقبلات الباردة، للمقبلات الساخنة، للحلويات يلي بتخلي البرانش كامل من أولو لآخرو. يعني إذا شي نهار عبالكن تعزموا حدا وتبيضوا وجكن ببرانش لبناني، بس بأسلوب عصري، ميريس خيار بيستاهل التجربة!

ونحنا مبسوطين إنو مطاعم جديدة وكافيهات عم تفتح، خاصة مع هالمحلات الجديدة يلي عم تضيف روح وحيوية لضبيه.

إذا عبالكن تجربة مختلفة، ميريس صار جاهز يستقبلكن!

العنوان: The Village، ضبيه
الرقم: 795 745 70

شوفوا كمان، ١٥ محل بيعملوا شوكولا وزينة لمناسباتكن الحلوة!